A tawp thlenga ding thin Ramos

Real Madrid khelmual San-tiago Bernabeu-a an au hla langsar tak pakhat chu “Hasta el final, vamos Real” tih a ni a, chumi awmzia chu “A tawp thlengin aw Real" tihna a ni - he au hla hi ama ta bik ang maia cheibawltu mi pakhat a awm a, a nunah he 'hlapui' hi a seng lut - a hming chu Sergio Ramos a ni.

UEFA Champions League 2013-14 final, UEFA Super Cup 2016, kumin El Clasico leh kumina Real league match hnuhnung berte khan in anna pakhat an nei - Ramos-a'n injur time-a goal a khungna match pawimawh vek an ni! Vawiin tlai dar 4:00-ah Mexican club Club America chuan FIFA Club World Cup-ah Real Madrid chu semifinal an khelhpui dawn a, injury time-ah Spanish defender hi box chhunga an ven uluk a him ang!

Tuihalna reh thei lo

Real Madrid captain Ramos chuan, "Nitin hi chona thar nen ka hmachhawn a, chu chu ka naupan tet aṭanga ka tih ṭhan dan a ni. Hmingṭhatna duhin ka tuihal ngai lo a, kumtina hmasawn zel hi ka thil duh ber chu a ni. Eng nomawi nge kan chawi tawh tih ka ngaihtuah lo a, chona thar hmachhawn zel hi ka duh. Ka taksa a inpeih chhung chu ka inkhel ang," tiin a sawi.

Kuminah Real-in Cham-pions League nomawi 11-na an chawi a, UEFA Super Cup-ah an champion bawk. Mahse, Ramos-a'n a la duhtawk lo a, FIFA Club World Cup-ah champion ngei a duh. Europe champion an nih vanga semifinal lut sa Real captain chuan, "Kan nomawi hunna lamah nomawi tam zawk hmuh belh zel ka inbeisei a ni," a ti.

Lawmman chu inah

Zinedine Zidane-a naute hian International Stadium Yokohama-a America hi an hmachhawn dawn a, North America khawmualpui cham-pion lakah awlsam taka chak theih a ni dawn lo. Mahse, kum ṭha tak hmang mek Ramos chuan an kum duhawm hman chu hlimawm thei ang bera an khar theih nan theihtawp a chhuah tur thu a sawi.

Sergio Ramos chuan, "Kan tana kum ṭha tak kan hman hi a ṭha thei ang bera a hnu khar kan duh a, Japan-a Club World Cup khelh hi kan tan chuan kan thawhrim 'lawmman' ang a ni a, he 'lawmman' hi in lama kan hawn a ngai a ni," tiin champion ngei a duh.

Final-ah

Nimin tlai khan semifinal inkhel hmasa zawkah South American Champions League champion Atletico Nacional leh inelna thlengtu Japan club ṭha Kashima Antlers an inhmachhawn a, Antlers hi 3 - 0 in an chak