Azpilicueta-a'n contract thar ziak

Cesar Azpilicueta chuan Pre-mier League hmahruaitu Chelsea tan kum 2020 thleng daih tur contract thar a ziak. Blues-in kum li liamta a pound maktaduai sariha an lakluh Azpilicueta hi Antonio Conte hnuaiah player pawimawh berte zinga mi a ni a, tun season league match zawng zawngah inlan kim vekin David Luiz leh Gary Cahill te nen bang rinawm an ni.

Kum 27-a upa Azpilicueta chuan, "Kum thum leh a chanve daih contract thar ka ziak thei hi ka lawm hle. He hmuna ka rawn kal tirh khan mimal hmasawnna leh club tana nomawi a tam thei ang ber chawi kha ka thil tum a ni a, tunah chuan ka thiltum ti hlawhtling turin hun ṭha ka neih belh leh dawn ta," tiin a sawi.

Chelsea hi tun season Premier League khelh mekah tlarhnung phui ber an ni mek - match 15 khelh tawh aṭangin goal 11 chiah an la chhuah.