Aubameyang a nghing?

Pierre-Emerick Auba-meyang chuan Real Madrid tana khelh a chak thu a zep lo. Hetihrual hian tun dinhmunah chuan Borussia Dortmund chhuahsan tumna a neih loh thu a sawi tel bawk!

Gabon international hi tunlai khawvela striker hriam berte zinga mi a ni a, Champions League group stage-a Real Madrid nen an inhmachhawn ṭuma goal khungin a club chu group hmahruaitu a nih pui.

Kum 27-a upa Au-ba--meyang chuan, "Real Madrid hian kan chhungkua nen inzawmna a nei a, he club tana khelh hi ka naupan lai aṭang tawha ka duhthusam a ni. Thuthar thehdarhtuten ka duhthusam hi an ziah uchuak deuh ṭhin avangin zawhna ka dawng tam hle. Tunah hian Dortmund tan ka khel mek a, he hmunah hian ka hlim rih," a ti.

Dortmund tan match 109 a khelh aṭanga goal 69 khungtu Aubameyang hi French Ligue 1 champion Paris Saint-Germain pawhin Signal Iduna Park aṭanga lakchhuah an duh nia sawi a awm bawk.

Aubameyang chuan zawhna chhangin, "PSG hian min be ngei a, mahse hei vang hian ka chhuak dawn tihna a ni chuang lo," tiin a sawi.