Tlangnuam an him

Mahuma Memorial Cricket Tournament khelh mekah nimin khan Tlangnuam chuan 1st Division khelh chhunzawm zel turin relegate chiang tawh Chaltlang chu wicket thumin an hneh a, Tlangnuam chak avang hian Luangmual chuan 1st Division an mangṭha a ṭul ve bawk.

Chaltlang hian over 23.5-ah run 88 chiah siamin wicket an hloh vek a, run 22 siamtu captain Lalhruaimawia'n bul ṭan ṭha mah se batsman dang zingah run 10 vaw kai thei an awm lo - over 4.5 a vawma run 14 chiah pea wicket 4 latu Tlangnuam bowler Lalmuanpuia an ngam lo hle.

Division hniam lama tla chiang tawh Chal-tlangin mualpho taka 1st Div mangṭha duh lo mah se Tlangnuam batsman ten over 24.2-ah wicket sarih hloha an target umphain hnehna an chang ta zawk a ni. Vawiin chawhma dar 9:15 hian league round match hnuhnung ber chu Chanmarians leh Chhinga Vengin an khel ve leh ang a, Inrinni aṭangin semi-final khelh ṭan a ni ang.