Payet-a'n hmun dang a ngaihtuah lo - Bilic

Slaven Bilic chuan a player duhlai Dimitri Payet-a'n West Ham ni lo club dang ngaihven a neih loh thu a sawi chhuak. Kum 29-a upa Payet hi tun hnaiah an club-in beisei an phak loh avangin boruak dang nei anga sawi a awm fo a ni.

France international Payet hi season hmasa khan Premier League player langsar berte zinga mi a ni a, an ramin an thlen European Championship 2016-ah khan player pawimawh a ni phak bawk. Tun season-ah a club khelhna Hammers-in beisei an phak lo a, hei vang hian Ballon d'Or a 17-na ni phak hian club dang a ngaihven a nih pawhin a awm lo hran lo.

Bilic chuan, "Thawhṭanni khan Dimitri Payet nen hian kan inbia a, kan season hman lai bak ngaihtuah a nei lo. Season hmasa khan ani hi kan player pawimawh leh langsar ber a ni a, kuminah pawh a la danglam chuang lo. Club dang ngaihtuah buaina hun a ni lo," tiin a sawi.

West Ham hian tun season match 15 khelh tawh aṭangin point 13 chiah an la hmu a, table-ah 17-na niin an hnuai chiaha awm Swansea City aia an sanna chu point khat chiah a ni rih.