Marin chak lo nghal

Nimin khan season khat chhunga badminton thiam zual pariatte inelna 2016 BWF Super Series Masters Finals chu Dubai, United Arab Emirates-ah khelh ṭan a ni a - world number 2 Carolina Marin a chak lo nghal.

Hamdan Sports Com-plex, Dubai-a inkhel-ah Sun Yu-i'n harsatna nei loin game hmasa ber chu 21-18 in a la nghal. Chinese shuttler hian game hnihnaah pawh 20-15 laia hma a hruai hman avangin chak tlang tura ngaih a ni. Mahse, Sapin nula Marin hian a tawnhriat ngah chhawr
ṭangkaiin point ruk a hmu zawn a, 20-20 a nih pui. Hun pawimawhah Yu che fuh hmasa leh zawkin 24-22 in game hnihna a la zui a, hnehna a chang.

Marin leh Yu hi tun hmain vawi hnih an lo inhmachhawn tawh a, 2015 leh 2016 Denmark Open kha niin Marin hian hnehna a chang ve ve. Nimin inkhel dangah Sung Ji-hyun chuan Ratchanok Intanon chu 21-19, 21-12 in a hneh a, Tai Tzu-ying pawhin 21-16, 21-13 in He Bingjiao a hneh ve bawk.

Kum 23-a upa Marin hian Rio Olympic-ah khan PV Sindhu hnehin a vawi khat nan Spain tan gold medal a vaw chhuak a, Brazil aṭanga a haw hnuah beisei a phak rih lo. BWF Super Series Masters Finals hi vawi li a khel tawh a, hengahte hian final a la lut miah lo. World number 1 hlui tan record duhawm lo tak thai bo tur chuan a insiamṭhat nghal a ṭul ang.

BWF Super Series Masters Finals-ah hian India chhuanvawr PV Sin-dhu chu a vawi khat nan a inlan ve. Rio Olympic silver medalist hian nizan khan a match hmasa ber khelin Akane Yamaguchi a hmachhawn a, he thu buatsaih lai hian result kan hre hman lo.

BWF ranking-a a sang pariatte hi group pahnihah ṭhen hran an ni a, group match-ah an inkhelh kual vek hnuah a sang pahnih ve vein semifinal an lut dawn. Sindhu hi Group B-ah Akane Yamaguchi, Sun Yu leh Marin te nen an awm khawm. Group A lamah Tai Tzu-ying, Sung Ji-hyun, Ratchanok Intanon leh He Bingjiao te an awm thung.

Mipa inkhel hmasa berah China tlangval Tian Houwei chuan 21-15, 21-7 in German tlangval Marc Zwiebler lakah hnehna a chang nghal. Inkhel hnuhnung zawkah champion tura rinkai Jan O Jorgensen chuan 21-8, 21-5 in Hu Yun a sawp ve bawk.

Mipa inelna lamah hian Group A-ah Jan O Jorgensen, Tian Houwei, Marc Zwiebler leh Hu Yun te an awm a, group lehlamah Son Wan-ho, Ng Ka Long, Lee Chong Wei leh Viktor Axelsen te an awm - inelna hi Decem-ber 18-ah zawh tur a ni.