Rosberg thlaktu tur chiang thei lo

Formula 1 team Mercedes chuan world champion a nih hnu lawka intlansiak chawlhsantu Nico Rosberg thlak tur an zawng mek a, an duh angin thil a kaltuang vek bik lo.

German driver Rosberg hmun ruak luah tur hian world champion vawi li ni tawh Sebastian Vettel chu an duh ber nia sawi a ni a, mah se Ferrari driver hian kum khat daih contract a neih lai hman zawh a duh thu a sawi tawh. Valtteri Bottas hming lamrik a ni leh a - ani pawh hi Williams lamin chelh an duh.

Khawthlang media-te chuan Mercedes-in Bottas lakluh an dilna chu Williams lamin an hnawl sak tawh niin an tarlang leh tawh. World champion vawi thum ni tawh Lewis Hamilton teammate tur hi tun thlengin a la chiang thei lo thung.

Kum 27-a upa Bottas hian Formula 1 intlansiakah hnuhma ropui tak a la nei lem lo. Kum 2013 Australian Grand Prix kha a inlanna hmasa ber niin kuminah point 85 hmuin pariatna a ni.

Mercedes boss Toto Wolff chuan, "Rosberg hmun ruak luah khat tur zawn hmuh hi thil harsa a ni lo a, chutihrual erawh chuan khawvela a ṭha ber neih kan duh avangin hmanhmawh taka thutlukna siam ngawt theih a ni lo. Driver tam takin Mercedes car khalh an duh a, mah se he car khalh tlak tur tak kan thlang ang," tiin a sawi.