Irving tel loin Cavs chak nuamsa

NBA champion Cleveland Cavaliers-in ke na vangin Kyrie Irving chhawr thei lo mah se Memphis Grizzlies hneh turin harsatna an nei lo. Cavs hian nimin zing khan 103-86 a hnehna changin regular season kal meka vawi 18 hnehna an channa chiah a ni.

Quicken Loans Arena-a inkhel-ah a dan pangngaiin LeBron James a langsar leh a, nikum NBA Finals MVP hian point 23 a score bakah rebound vawi ruk a la bawk. Tyronn Lue-a enkawl Cavs tan forward Kevin Love-a'n point a score hnem ber (29 points) a, ani hian rebounds vawi 13 a la bawk.

Eastern Conference lamah Cavaliers hian match 18 hnehna changin ṭum nga an chak lo tawh thung a, table-ah hmahruaitu an ni. An hnuai chiahah hian vawi 17 chak tawh Toronto Raptors an awm.

Nimin zing Western Conference inkhelah Golden State Warriors chuan 113-109 in New Orleans Pelicans an hneh. Warriors hi an match hnuhung pasarihah vawi nga an chakna chiah a ni.

GSW tan Draymond Green chuan point 12 score-in rebounds vawi 12 a lak bakah assists vawi 10 neiin tun season-a a vawi khat nan triple-double a nei.

Golden State coach Steve Kerr chuan, "Draymond hian hetiang dinhmun thlen hi a chak a, a phu bawk. A taimak bakah a thawkrim a, a ṭha berte zinga mi a ni," tiin a player duhlai a fak.