Arsenal kaltluang tawpniah Foxes chak bik lo Keimahni tihsual kan tuar - Wenger

Arsene Wenger-a naute Premier League-ah a zawna match 14 chhung hneh loh nei loa an kaltluang chu a tawp. Thawhlehni zan inkhelah Arsenal hi Everton khelmualah 2-1 in an tlawm a, inkhel dangah champion lai Leicester City chu AFC Bournemouth lakah 1-0 in an chak lo bawk.

Everton an tho chhuak

Goodison Park-a inkhelah Alexis Sanchez-a'n minute 20-naah goal hmahruai a khung. Chile international hian Premier League match a khelh hnuhnung 27-ah goal 19 a khungna a ni a, assists vawi riat a nei tel bawk. Barcelona star hlui hian freekick aṭangin tun season-a Gunners goal hma-hruai a vawi nga nan a khung.

Ronald Koeman-a naute hian league match bikah Arsenal an mikhual hnuhnung vawi 10-ah ṭum khat chiah hnehna an chang a, an chak lo leh ngei dawn niin a lang. Mahse, Toffees an zam bik lo. Seamus Coleman chuan Leighton Baines-a cross chu chawlhlawk hma chiahin an si phurh sut nan a tauh lut.

Wenger-a'n goal khung belh tumin Olivier Giroud leh Lucas Perez te dah lut mah se danglamna an thlen thei lo. Minute 85-naah Ashley Williams chuan corner aṭanga ball lokal chu an chakna goal atan a tauh lut. Hun tawp dawnah Phil Jagielka chu yellow card vawi hnih hmuh vangin hnawhchhuah a ni a, kartawpa Merseyside derby an khelh hunah a inlan thei lo ang.

Gunners an chuai?

Season ṭan niah Arsenal hian Emirates Stadium-ah Liverpool mikhualin 4-3 in an tlawm. Hemi hnuah Gunners hian Everton an hneh loh hi an chak loh lehna hmasa ber a ni. Hliam vangin captain Per Mertesacker leh Shkodran Mustafi an chhawr thei lo - an goal chhuah hmasa zawkah Gabriel Paulista-a'n a hna a thawk ṭha tawk lo a, goal hnuhnung zawkah Mesut Ozil-a'n inkhelah a rilru a pe tawk lo tih a chiang bawk.

Arsenal hian a zawnin match 11 chhung chu an goal an venghim tluan thei tawh lo a, kum 2004 hnua a vawi khat nan league nomawi chawi an duh a nih chuan an tlarhnung an rem phui a ngai.

Manager-te thukhawchang

Arsenal manager Wenger chuan, "Inkhel bul kan ṭan ṭha-in ball pawh kan chang tam a, goal kan khung bawk. Mahse, Everton lam khan tharum an hman nasat hnuah kan talbuai a, kan goal chhuah pahnih kha chu ven theih a ni. An player hlauhawm Romelu Lukaku veng thei mah ila midang tan hmun kan siamsak a, an goal an venhim ṭhat bawk avangin thil a harsa," tiin a sawi.

Everton manager Koeman chuan, "Minute 20 chhung kha chu kan hlauthawng tih phat rual a ni lo, ball kan chan pawhin kan hloh nasa. Mahse, kan theihna tak kan tihlan chinah erawh lawmna tur a tam hle. Hun tawp dawna goal kan khung avangin kan vannei ang pawhin a ngaih theih, chutihrualin hnehna chan phu khawpin kan khel ṭha," a ti.

Hriatthiam har Foxes

Claudio Ranieri-a'n a naute khelh dan ngelnghet lo lutuk vangin a mangan thu a sawi tawh. Italian manager thu sawi ang ngei hian Leicester City hi Premier League season kal meka team hriatthiam harsa ber pawl an ni mek.

Champion lai tan Pep Guardiola enkawl Manchester City 4-2 a hneh hnua an match hmasa bera Bournemouth hmachhawn zui hi thil huphurh-awm niin a lang lo. Kai thar team hian Marc Pugh goal hmangin Foxes hi an hneh a, match 16 khelh aṭanga point 21 hmuin league table-ah pariatna an ni mek - an club chanchina an tawn san lai ber a ni.

Cherries hian an khelmuala an league match khelh hnu-hnung pasarihah vawi nga hnehna an chang thei. Arsenal aṭanga loan hmanga an hawh Jack Wilshere chu player pawimawhte zinga mi niin tun season-ah minute 932 a inlan tawh - England international hi tun hnai season hnih liam ta a Gunners tana a inlan zat aiin Cherries tana khelmual chhunga a hun hman hi a tam tawh zawk!

Bournemouth manager Eddie Howe chuan, "Champion lai kan lo mikhual a ni a, an theihna san zia kan hrechiang. Ka nauten inrintawkna an neih miau avangin hnehna kan chang a, a bik takin kan tlarhnung khan fak an phu," a ti.

Leicester manager Ranieri chuan, "Goal khung turin hun ṭha kan insiam tam zawk a, a pumpui thlirin chak kan phu bawk - chuti chunga kan chak lo kha kan tan hriatthiam a har hle," tiin a sawi ve bawk.

Kum 65-a upa Ranieri hian Premier League-ah match 200 a naute a enkawl tling ta a, Italian manager zingah hetiang dinhmun thleng thei hmasa ber a ni. Chelsea chu match 146 a enkawl hnuah Foxes hi match 54 a kaihruai leh tawh.