Ramhlun North-in MPL khel leh dawn?

15th December, 2016

Mizoram Premier League Season 6 Playoff-ah Ramhlun North-in Aizawl khaw pawn club New Serchhip FC chu 6-1 in an sawp a, second leg khelh tur la awm mah se Mizoram football inelna sang ber khel tur a chiang tawhah a ngaih theih.

Nimin tlai Lammual in-khel-ah Ramhlun North tan Nigerian forward Onyeama Francis-a'n goal hnih a khung bakah Lalramzauva Khiangte, Lalremruata, Isaac Lalruatpuia leh Zosangliana Sailo ten goal khat ṭheuh an khung bawk.

New Serchhip-in goal khat chiah khung mah se an khung chhun erawh a ropui, minute 41-naah Ramhlun North defender C. Ramdinmawia ball tauh chhuah chu Lahriatzuala'n kawh zetin a pet goal.

MPL6 playoff-ah Ramhlun North kawng engkimah an chungnung a, Lalruatliana Sailo hote hian nimin tlai hian MPL5 match 14 chhunga an goal khung chanve an khung a, chance ṭha an hlah nual bawk. New Serchhip tan MPL club an ṭha lutuk hret a, inhliam chungin H. Lalremruata (Arapa) luhtir ngial mah se FC Kulikawn player hlui hian danglamna a thlen thei lo.

Ramhlun North coach Lal-ruatliana Sailo chuan, "Kan khelh dan a lungawi thlak a, MPL club ngaihtuah chuan khingpuite an nêm ve bawk. Goal tam zawk khung thei dinhmunah ding mah ila football-ah chuan goal chance zawng zawng khung theih a nih loh avangin ka player-te kha tihsual an neiah ka ngai lo. Minute 90 khelh tur kan la nei a, theihtawp chhuahin kan la khel leh ang," tiin Vanglaini palai a hrilh.

New Serchhip coach Lal-hriat-renga chuan, "MPL club an danglam a, kan tluk lo a ni. Chutihrualin goal kan chhuah tam chhan erawh player inhliam kan ngah vangah a ngaih theih a, kan ṭhat theih dan berin kan khel chhuak thei lo a ni. Tunah hian playoff a la zo lo a, theihtawp chhuahin second leg kan khel leh ang," tiin inthlahdul an la tum loh thu a sawi.

Ramhlun North leh New Serchhip hian December 16, Zirtawpni tlai dar 1:00-ah second leg an khel leh ang.

ZoFooty Statistics

Ramhlun North FC 6 - 1 New Serchhip FC

RNFC : Lalramzauva Khiangte 15'; Lalremruata 35'; Isaac Lalruatpuia 37';

Onyeama Francis 42, 76'; Zosangliana Sailo 83'

NSFC : Lahriatzuala 41'

53% Ball Possession 47%

15 Shots 5

3 Yellow Cards 1

0 Red Cards 0