Netherlands an chak

Ronald Koeman-a enkawl Netherlands chuan World Cup hmaa an match hnuhnung berah World Cup khel ve tur tho Uzbekistan chu 2-1 in an hneh a, player 10-a inkhel an khar chunga an result avang hian an lawm khawp ang.

Netherlands hian an match hmasa zawkah Algeria chu 1-0 in an ngam lo tawh a, Dutch team khelh danin sawisel a hlawh. Mahse, World Cup hmaa an match hnuhnung berah erawh an chak a, an inringtawk sawt dawn.

Dutch team tan Cody Gakpo chuan goal hnih a khung a, Liverpool forward goal khung erawh penalty aṭanga a chhuih luh ve ve a ni thung - Uzbekistan hian hun pek belh minute hnihnaah Igor Sergeev hmangin si phurh an sut a, 1-1 a ni.

Algeria laka chak lo tawh Netherlands hi hetah hian an kim lo tawh a, PSV Eindhoven attacking midfielder Guus Til chu minute 87-naah hnawhchhuah a ni - an hlauthawng hman takzet.

Mahse, hun pek belh minute sarihnaah Netherlands hian penalty an hmu leh a, Gakpo bawkin goal-ah a chantir. Dutch team-in 2-1 in hnehna an chang a, team boruak chhe lutuk tur a dai deuh.

Netherlands hian an match hmasa ber chu June 14, Pathianni zan dar 1:30-ah an khel dawn a, Japan an hmachhawn dawn - Sweden leh Tunisia an hmachhawn zui dawn a, a awlsam dawn lo.