Chak chungin World Cup-ah Spain

European champion Spain chuan World Cup inbuatsaih nana an match hnuhnung berah 3-1 in Peru an hneh a, boruak ṭha tak nen an World Cup match hmasa ber an hmachhawn thei dawn - June 15, zan dar 9:30-ah an match hmasa ber khelin, Cape Verde an hmachhawn ang.

Spain hian an friendly match hmasa zawkah Iraq chu 1-1 in an inhnehtawkpui a, world champion beisei tan result ṭha a ni lo. Niminah erawh Spain an insiamṭha a, goal thum an khung.

La Roja tan Mikel Oyarzabal chuan minute hnihna lekah goal hmahruai khungin, Pedri-a'n minute 32-naah a belhchhah - Peru goalkeeper Pedro Gallese chuan an lamah a tilut bawk a, Spain hian 3-0 in hma an hruai hman.

World Cup khel lo tur Peru tan Jairo Vélez chuan goal khat khung ve mah se, si thum lawih an chhuah hman avangin awmzia a nei thui tawh lo a, European champion lakah an tlawm.

Spain coach Luis de la Fuente-a'n World Cup-a an inrem dan tura ngaih theih turin squad a rem a, hetihrual hian Lamine Yamal, Nico Williams leh Víctor Muñoz te chu hliam vangin an la inlan thei lo.

De la Fuente-a'n a player-te chu World Cup-a an match hmasa berah an inlan theih tur thu a sawi a, Yamal leh Nico hi an dam a nih chuan tlarhmaah Oyarzabal nen, an pathumin inkawp tura ngaih an ni.

Spain hian Cape Verde bakah Saudi Arabia leh Uruguay te group H-ah an awmpui a, La Roja hian harsatna liantham tawk loa round of 32 chu an luh mai a rinawm.