Origi a chawl ta

Liverpool striker hlui, hun pawimawha goal khung thei tak Divock Origi chuan inkhelh a chawlhsan thu a puang ta. Kum 31 mi lek ni chunga a ballboot khai tur Origi chuan, "He game-a ka tih turte chu ka hlen tawh a ni," tiin football a mangṭha.

Belgium tan vawi 32 inlana goal thum khungtu Origi hian AC Milan-ah a hun tawp chu a hmang a, nikum December khan Italian club-a a contract hi titawpin, club zawm a nei leh tawh lo.

Origi-a'n chawlh a puang zui a, Belgian striker beiseiawm tia a chanchin sawi a nih laia an beiseina ang chu phak ta chiah lo mah se, Liverpool fan-te tan chuan theihnghilh chi a ni lo.

Lille aṭanga a professional zinkawng zawh ṭantu hian July 2014 khan pound maktaduai 10-in Reds a zawm a, mahse, season khat atan Lille-ah loan-a khelhtir chhunzawm a ni zui.

Merseyside club tan inelna hrang hrangah match 175 khelin, goal 41 a khung a, Premier League, FA Cup, League Cup, Champions League, UEFA Super Cup leh FIFA Club World Cup-ah te champion nomawi a chawi.

Kum 2019-a Champions League nomawi an chawi nan phei chuan player thawhhlawk a ni a, semifinal first leg-a 3-0 a Barcelona an ngam loh hnu, second leg-a 4-0 a an comeback-na inkhelah goal hnih khungin, final-ah Tottenham Hotspur laka an chak nemnghehna goal a khung bawk.

Origi chuan, "Ka naupan laia ka duhthusamte chu a tak ram ka chantir a, football khawvela inelna level sang ber berah khelin, nomawi langsar tak tak ka chawi a ni. Ka thil tawn zozai avang hian Pathian chungah pawh ka lawm hle.

"Tunah chuan ka tum ka hlen ta a, hmun dang panin ka kal dawn ta. Zinkawng hlimawm tak zawh turin min la hmuak a ni," a ti a, Belgian striker hi fashion, kutkawih eizawnna leh khawtlang inrelbawlna lama hnathawk turin a chawl niin an sawi.