Final-ah ITI Veng hnehtu Chhinga Veng

Mizoram Rural Bank Pro Volleyball League khelh mekah, Thawhṭanni zan khan hmeichhe inelna chhunzawm a ni a, Chhinga Veng Spikers chuan 25-8, 25-12, 17-25, 25-15 (3-1) in ITI Veng GSA an hneh a, final an lut.

PVL hi LPS Arena, Falkland-ah khelh a ni a, zaninah Khawbel leh Anastasia Electric Veng te an inhmachhawn dawn. Inkhel hi Rs. 50 chauhin a hmunah a en theih a, LPS YouTube channel-ah (member only) a en theih bawk.

Thih leh dam inkar

Final luh inchuhna inkhelah Chhinga Veng an che ṭha nghal a, Anusree Poyili leh Elisian Medai hoin inkhel an thunun a, set khatnaah ITI Vengin an ngam lo hle

Set hnihnaah thil a danglam tam lo a, 22-12 aṭangin Chhinga Vengin point thum hmu zawnin Elisian chuan set an lakna point a thawk chhuak. Chiang taka set hnih an hloh zawn hnuah ITI Veng ṭantute an beidawng chuang lo a, chawl loin team an au phur reng.

Set thumna-ah erawh ITI Vengin hma an sawn a, Jashan Preet Kaur chuan a hma aia a vuak theih bakah Lalṭhazampuii'n a thlawp ṭha bawk. Zami'n a ball hmuh vawi thum a vuak tlak zawn hnuah Jashan chuan chiang takin a hlap tla bawk a, 13-7-in ITI Veng an sang.

Set hnih la zawntu Spikers erawh an talbuai a, an inthlauhna an tizim thei lo. Zami leh Jashan te langsarin point an hmuh zawn kar lakah Elisian chuan a tisual a, harsa loin set an la.

ITI Veng phur viau mah se an khelh ṭhatna an chhunzawm thei lo a, Spikers erawh insiamṭhain Anusree a langsar a, India captain pawh lo ni tawh Anusree hian an point hmuh hmasak panga thawk chhuakin Kuriz player of the match-ah thlan a ni zui a, ITI Veng innghahna Jashan chuan a tluk lo hle.

Zami'n set thumna angin point a hmu thei tawh lo a, Chhinga Veng tan Elisian leh Anusree an khelh ṭha tulh tulh a, ITI Veng tan pawh tlak rual a nih tawh loh avangin point sawma inthlau chungin Spikers an tlang.

Mangṭha ITI Veng

ITI Veng tan Punjabi tleirawl Jashan leh Zami bak point hmu thei an awm meuh lo a, player leh team khaikhinin Chhinga Veng an pha lo. League bul an tannaah ITI Vengin set thum faia Eric Pautu Academy an hneh hnuah ṭum hnih an tlawm zawn a, pathumna ni chungin an tla.

Kum 18 mi Jashan chuana teammate te hnen aṭangin puihna a dawng ṭha tawk lo a, Zami bak thlawptu a nei lo a, an chak loh chhanah a ngaih theih.

Chhinga Veng erawh vawi thum an khelhah tum hnih chakin league-ah pahnihna ni chungin tlang. Zirtawpni zan final-ah tun season-a an ngam loh leh vawi hnih an inkhelh tawha an hneh loh zawn mek Tuichangral lakah fiahna an hmachhawn leh a ngai dawn a, final hmuhnawm a beisei ngam.

Tuichangral hian Thawhṭanni vek khan Eric Pautu Academy chu 25-15, 25-11, 25-16 (3-0) in an hneh a, Tuichangral hi inkhelh hmaa an tlang tawh bakah, Eric Pautu Academy hi tla chiang sa an nih bawk avangin Tuichangralin tan final atana inpuahchahna a ni.