Wemby hoin Spurs an tho chhuak

NBA Finals game 3-ah San Antonio Spurs chu Victor Wembanyama hoin an tho chhuak a, finals-a an vawi khat chakna ni turin nimin zing khan 115-111 in New York Knicks an hneh. Best of seven series-ah 2-1 niin Spurs hian Knicks lehthal an tum.

Madison Square Garden, New York-a inkhelah Spurs-in bul an ṭan ṭha zawk a, Wemby hi point score bakah defence-ah a ṭangkai lehpek a, Mikal Bridges-a block chuan a team a tiphur sawt.

Knicks an awm mai mai bik lo a, Josh Hart-a'n three pointer vawi hnih a neih hnuah Jalen Brunson leh OG Anunoby ten point an neih chhunzawm bawk. Mahse Spurs tan Dylan Harper leh Julian Champagnie ten an chhang let leh nghal a, 22-33 in first quarter-ah hma an hruai.

Second quarter-ah erawh Knicks insiamṭhain team thar hlak ang an ni. Brunson aia lut Jose Alvarado-a'n Wemby lakah attempt a nei ngam a, Alvarado bakah Jordan Clarkson a khel ṭha a, tun season-a hmun chang tam lo Clarkson-a'n a hun ṭha neih a chhawr ṭangkai. Anni bakah hian Onunoby leh first quarter-a lang lo tak Karl-Anthony Towns an inlar bawk.

Spurs an inthlahdah thung a, ball an hloh ngun bakah an basket a tang rei. Knicks-in Brunson-a'n luhtir leh hnuah three points a rawn nei nghal a, 64-57 in Spurs hmahruaina an chhuhsak. Spurs tan Wemby, Harper leh Stephon Castle ten a khat tawka point an neih ve deuh reng avangin an inthlau lutuk tur an pawt zim.

Halftime chawlh laiin Spurs an infuih ṭha tih a hriat a, third quarter-ah a tir aṭangin an khel ṭha nghal. Knicks thiampuipa Brunson, Hart leh Anunoby ten point score ve reng mah se, Wemby-a'n a chhang let zel thei a, Harper-a'n a thlawp ṭhat bawk avangin point an in score chhawk zak zak hnuah 92-91 a hmahruai chungin third quarter an an khar.

Fourth quarter-ah Wemby bawkin point score-in bul a ṭan a, mawi taka ball an inpek kual hnuah point an nei a, awlsam taka an chak mai a rinawm hman. Mahse Knicks tan Brunson a inlar a, American point guard hian a team tan point hlawhchhuaktu ber a ni.

Brunson-a'n second 35 la awmah three points a lut a, Anunoby-a'n second 10 pawh awm tling tawh loah a luh ve leh avangin point hnih chauhin an inthlau. Spurs tan Castle-a'n free throw a hlawhchhuakin Knicks fans auh elna hnuaiah zam miah loin a lut ve ve a, Knicks-in an luh point an neih chhunzawm tawh loh avangin Spurs an chak.

French center Wemby chu Spurs chakna hnar a ni a, point 32 zet score-in innghahna tlak a nih zia a tilang a, Madrison Square Garden a ngawih tir ṭhup. Team pahnihte hi Ningani zing dar 6:00-ah an inhmachhawn leh dawn a, Spurs hian hnehna chan chhunzawm an duh chuan Wemby a khelh ṭhat a ngai a, a teammate te pawhin a hma aia an thlawp ṭhat lehzual a ngai tawh ang.