World Cup khel lo tur Timber

Premier League champion Arsenal defender Jurrien Timber chu a ṭhalah hliam a tuar a, World Cup khelh nan ni khat chiah awm tawh mah tihah Netherlands-in a khelh theih loh tur thu an tichiang a, squad aṭanga paih a ni.

Dutch football thuneitu sang Royal Dutch Football Association (KNVB) chuan Thawhṭanni khan Timber chu inelnaa tel thei khawpa a la dam chian tawk loh thu leh, a hriselna an ngaih pawimawh avangin tel rih lo mai se a finthlak zawk thu an sawi.

KNVB chuan, "Medical staff te nena kan inrawn hnuah, Uzbekistan nena friendly match kan neih zawh hian Timber-a hian New York-a national team te camp a chhuahsan dawn," tiin thuchhuah an siam bawk.

Kum 24 mi Timber hian March thla laihawl aṭang khan, a kawp bawrah na a neih avangin a lo chawl tawh a, mahse Champions League final-a Paris St-Germain nen an inkhelh ṭum khan minute 66-naah a lut. A dam chian theih loh avangin World Cup a khel dawn ta lo.

Timber a awm dawn loh avangin a aiah Lutsharel Geertruida chu koh nghal a ni a, Geertruida hi RB Leipzig player niin season hman zawh takah khan loan-in Sunderland-ah a khel. Oranje hi group F-ah awmin Japan, Sweden leh Tunisia te nen an awm ho a ni.