Rafa Marquez telna Mexico

Mi tam takin Mexico player ropui ber ang hiala an chhal Rafael Márquez chu kum 47 mi ni chungin World Cup-ah ram tan a feh chhuak leh dawn - tunah erawh a thawnthu a danglam ta deuh a, player ang ni loin, Mexico-ah hian Assistant Coach ni chungin a tel.

Barcelona tana 2003-10 inkara khel, a vanglaia player langsar ni phak Marquez hian ram tan match 147 khel hmanin, goal 17 a khungsak a, World Cup vawi nga zet chu captain armband hreng chungin a feh chhuak.

Mahse, Marquez hian round of 16 aia sang Mexico hi a thlenpui thei lo a, Assistant Coach angin, player a nih laia a tih theih loh hi tihhlawhtlin a duh dawn.

Thil danglam ve tak chu, Mexico hian kum 1994 aṭang khan World Cup an la khel ziah a, 2022 tih lohah kha chuan round of 16 an lut vek a, an paltlang lo vek thung!

Tun ṭumah hian Mexican manager hlawhtling ber pawl Javier Aguirre enkawlna hnuaiah Mexico an khel dawn a, beiseina an nei sang ang - Aguirre hian Mexico hi ṭum thum a enkawlna niin, CONCACAF Gold Cup-ah vawi hnih a champion pui tawh.

Nikum khan CONCACAF Nations League-ah pawh a champion pui a, kum 2001 khan Copa America an khelh ṭumin final a hruai thleng hial. July 2024 khan Mexico hi enkawl ṭan lehin, match 29-ah vawi li chiah a tlawmpui a, vawi 17 chakin, vawi riat an khingpui an draw thung.