World Cup khel turin Messi a inpeih

Lionel Messi a dam tawh a, nimin zing khan Argentina leh Iceland ten friendly match inkhelh ṭumin bench aṭanga lutin goal a khung. Auburn, Alabama-a inkhelah hian Argentina tan minute riatna lekah Valentin Barco-a'n a khung a, Messi hian penalty aṭanga minute 72-naah khungin minute 86-naah Thiago Almada-a'n a khung ve bawk.

Goal hmahruai khungtu Barco hi kum 21 mi chauh a ni a, Premier League club Brighton tan khel tawhin Ligue 1 club Strasbourg tan a khel mek. Argentina tan vawi li inlan tawhin goal hnih a khung a, amah hi left back niin box pawn aṭangin a pet goal.

Khawvel mit fukna erawh Messi a ni a, minute 70-naah Diego Simeone fapa Giuliano Simeone a thlak. Argentina captain ball ṭha bik um luttu Lautaro Martinez-a'n penalty a hlawh chhuak a, mintue 72-naah Messi hian goal a khung nghal.

Inkhelh banah Iceland aṭanga bench aṭanga lut Daniel Gudjohnsen chuan, "Ka pa nen inkhel dun ṭhin. Tu ka nih min hria em?" tiin Messi a zawt a, Argentine captain hian a hre nghal lo mah se a insawi hnuah Eidur Gudjohnsen fapa tih a hria. Messi chuan, "Gudjohnsen-a fapa a nih thu min hrilh. Mahse, ka hre chiang lo. Khatih lai khan a la naupang lutuk a, chutihrualin hmuh erawh ka hmu ngei tawh. A pain training-naah a rawn hruai a, mah se naupang mai a la ni," tiin a sawi.

Daniel hi kum 20 mi a ni tawh a, Barcelona leh Real Madrid academy-ah inzir tawhin Malmö FF tan a khel mek a, ram tan vawi nga a inlan tawh a ni.