Final-ah a vawi nga nan Hunthar

Mizoram Rural Bank Pro Volleyball khelh mekah Thawhlehni zan khan, Hunthar chuan 25-20, 19-25, 25-20, 25-19 (3-1) in Chhinga Veng Spikers an hneh a, Mizoram volleyball inelna sang berah a vawi nga nan final an lut.

LPS Arena, Falkland-ah PVL hi khelh a ni a, zirtawpni zan hian hmeichhe final khelh chhunzawm tur niin Tuichangral leh Chhinga Veng Spikers te an inhmachhawn ang. A hmuna inkhel en man hi Rs. 50 a ni a, LPS YouTube channel-ah (member only) a en theih bawk.

Hunthar an ṭha

Set khatnaah Hunthar an chungnung zawk a, rinrawl Suryansh Tomar a che tha a, vawi 37 hlap tlain first set-ah pawh a che ṭha nghal a, set an lak hmasak theihna hnar a ni. Suryansh hi Kuriz Player of the Match-ah thlan zui a ni bawk.

Set hnihnaah erawh Chhinga Veng an insiamṭha a, Cuban player Morales Ponce De Leon chuan point 29 hmuin 12 a hloh an inkhelh hmasak aiin hnuhma a nei tha zawk. Hunthar an inthlahdah hret avangin Chhinga Vengin set hnihna an la a, an phur hle.

Chhinga Vengin set hnihna thunun mah se set thumnaah Huntharin hma an sawn a, Suryansh chuan vaw tla zawnin Morales-a'n a chhang let hleithei lo a, a hlap sual zawn hial. Spikers-in setter C. Zonunmawia la chhuakin H Lalruatsanga an dah lut a, Chungnunga vuak an dan hneh avangin Zira lut bawk mah se thil a danglam lo.

Spikers-in vuak vak aiin point an zawng nasa a, Morales-a'n a nam tlak hnuah 19-17-in an hnaih hman na a, Suryansh an dan thei lo a, point ngaa inthlau chungin Huntharin a vawi hnih nan set an la.

Set linaah kir leh thei turin Chhinga Vengin ṭha takin bul an ṭan a, Suryansh-a'n a vuak sual hnuah 7-1-in an sang. Mahse, Huntharin inkhel an thunun zui a, hawi kir tawh loin an hnehna an chang a, final an lut.

Zinkawng tawpna

Chhinga Veng tan an ram pawn player Morales a che ṭha a, mahse a Mizo player ten Morales an thlawp ṭha tawk lo a, an chak loh chhan pakhatah a ngaih theih.

Spiker Mizo player zingah Vanlalṭanpuia'n vawi 10 vaw tlain vawi thum a tisual a, set thumna aṭangin captain Lalchungnunga leh amah thlaktu Lalnunzira an talbuai nasa zual a, an khelh ṭhat rual loh avangin an phurna a tlahniam a, a vanduai zawkah an ṭang zui.

Hunthar erawh league round hnuhnung bera Spikers an hmachhawn aiin an khel ṭha zawk a, mimal takin Suryansh a langsar a, a vawi nga nan Huntharin champion an beisei.