Atletico-in Real ngamna zet tlem an ti

Real Madrid chuan Argentine striker Julian Alvarez lei tumin an hmelma Atletico Madrid an dawr a, an ngamna zat pawh euro maktaduai 150 (£130mtd) a ni pha hial. Mahse, Alvarez-a release clause pawh euro maktaduai 500 (£430m) a ni a, Atletico hian Real rawn dawrna chu fiamthu nan an hmang.

European football-a sulhnu nei ṭha ber Real Madrid hian kar liam ta khan Florentino Perez chu President-ah an thlang nawn a, Perez hian inthlan hma hian £150mtd man player lei a tiam. Real President hian a intiamna tih hlawhltin tumin Alvarez lakluh a tum a, mah se £150mtd chuan a la lut dawn lo tih a chiang.

Real Madrid chuan, "Board of director te an ṭhukhawm a, Atletico Madrid dawrin Julian Alvarez man atan euro maktaduai 150 an thehchhuak. Atletico-in lawm taka kan dawrna lo pawmin, uluk taka an zir chian hnuah player 'release clause' rawn tarlangin kan dilna zat an pawm loh thu an tarlang," tiin thuchhuah an siam.

Los Blancos hmelma Atletico erawhin an thuchhuah chu deusawh takin an chhanglet. Atletico chuan, "Zirna leh lawmthu sawina inhriat pawlh a ni ngei ang. Mahse, eng thilah mah lawmthu kan hrilh lo che u. Julian Alvarez dawrna reng reng kan zirchiang lo a, kan ngaihtuah hek lo. Inthuchhuah hian min tihlim hle a, Barcelona min dawrna ai pawhin kan nuih a za zawk. In President thar nena kan inkar ṭha tak hi remchangah lain, kan academy player-te hi min ruk sak tawh suh u," tiin a sawi a, emoji nui lai an dah ṭheuh bawk.

Alvarez hian Manchester City aṭangin pound maktaduai 81.5-in kum 2024 khan Manchester City aṭangin an la lut a, World Cup 2022 champion zinga mi a ni. Argentine forward hian season hman zawh takah khan Atletico tan match 29 khelin, goal 20 khungin La Liga-ah palina a nihpui a, Champions League semifnal a thlenpui bawk.

Real Madrid hian indinthar an tum a, head coach Alvaro Arbeloa chhuah tur thu an tichiang tawh. Arbeloa aiah an manager hlui Jose Mourinho an la lut dawn a, nipui bazarah thawm an nei lian khawp ang.