Man United-in Darlow an ngaihven

Manchester United chuan Leeds United keeper Karl Darlow chu, Senne Lammens thachhang dawltu turin lak luh an duh a, mahse Leeds hi United hmelma an nih avangin thil a awlsam dawn lo.

United hian kar liam ta khan an keeper neih sa, Tom Heaton chu kum khat dang cham turin contract thar an ziahpui a, mahse Heaton hi kum 40 a nih tawh bakah third choice tur chiang sa a nih avangin, second choice tur keeper dang an melh.

Red Devils hian Heaton leh Lammens baklah Altay Bayindir an nei a, loan-a chhuak Andre Onana a rawn kir leh dawn bawk. Mahse Bayindir leh Onana hi United-in hralh dan kawng an dap a, chhawr zui an tum lo.

Hetiang boruak karah hian Darlow hming a ri a, kum 35 mi keeper hi second keeper ni turin an duh. Wales international hian saeson liam ta khan match 24 a khel a, season chawhnu lamah an rinrawl Lucas Perri nek chhuakin first choice a ni. Darlow hi Newcastle tan pawh a khelh tawh avangin Premier League-ah tawnhriat a nei ṭha.

Heithlai huian United leh Leeds hian inhmelma an ni a, an inkara indawrtawnna hi a thleng khât hle. Kum 2004-a Alan Smith-a'n Old Trafford a pan kha Red Devils-in Leeds aṭanga player an lakluh hnuhnun ber a ni.

Smith hian pound maktaduai sarihin United hi a pan a, hemi ṭum hian Danny Pugh chuan Old Trafford chhuahsanin Leeds a pan ve thung. Hemi hma chiah, 2002 khan Rio Ferdinand chu pound maktaduai 29-in Leeds aṭang hian Manchester-ah a lo insuan tawh bawk.

Hemi a nih avang hian, Darlow hian kumin nipui transfer-a Man United hi a zawm a nih chuan, Leeds leh Man United inkara indawr thleng tlemte zingah a hming a chuang ve dawn. Premier League transfer window hi June 15-ah hawn a ni dawn a, Leeds-a Darlow contract hi June 30-ah a tawp thung dawn. Darlow hi a thlawna Elland Road chhauhsantir tawp ai chuan man neia chhuahtir an duh zawk dawn.