Knicks tan champion a hnai

New York Knicks chuan nimin zing khan, halftime-ah San Antonio Spurs laka point 27 zeta an hnufual tawh hnuah lehthalin 107-106 in an chak a, NBA Finals khelh mekah 3-1 a hmahruaiin, champion turin match khat chiah chak an mamawh tawh.

Madison Square Garden, New York-a inkhelah Spurs-in bul an ṭan ṭha zawk a, Victor Wembanyama chu paint area-ah Knicks player ten an ngam lo a, Knicks tan Mikal Bridges kut kal nghal mah se minute li khelh tur la awmah Spurs-in point 30 an score tling der a, first quarter a zawh meuh chuan 41-22 in hma an hruai.

Second quarter-ah pawh thil a danglam lo a, Karl-Anthony Towns leh Jalen Brunson ten point nei nghal mah se, a hma aiin Spurs player te kut a kal a, Fox, Julian Champagnie, Dylan Harper leh Devin Vassell ten three points hmangin an chhang let. Knicks tan Brunson leh OG Anunoby ten point score chhunzawm ve mah se, Spurs an phur laklawh a, 76-49 in chawlhlawk an hmang.

Spurs-in hma an hruai fal tawh avangin awlsam taka an chak a rinawm tawh a, mahse beisei ang ngawtin thil a kal lo - Knicks tan Anunoby-a'n three points hmangin bul a ṭan a, Brunson leh Hart bakah Anunoby ten an luh belh.

Brunson a inlar chhunzawm a, point a neih loh pawhin foul a hlawhchhuah bakah, a ṭhiante a siamsak thei zel a, 90-75 in an inthlauhna an tihniam. Knicks hi an defence a khawng ṭhat bawk avangin third quarter-ah Spurs-in point 14 chauh an score thei.

Fourth quarter-ah Harper leh Wemby te hmangin Spurs-in point an score hmasa zawk mah se, Knicks player te kut a kal lehzual a, an mamawh tak three points chu Anunoby, Towns leh Jose Alvarado ten an lut zel a, Spurs-in 'time out' an hmang hial.

'Time out' hnuah Spurs tan Fox leh Wemby ten point an nei leh nghal a, an chak a la rinawm zawk tho. Mahse Alvarado leh Brunson ten three points an lut leh a, Knicks-in point khatin hma an hruai.

Castle-a'n free throw vawi hnih a luh hnuah Fox-a hun ṭha neih chu Anunoby-a'n a block sak a, Anunoby bawk hian second khat chiah awm tawhah an chakna point a score chhunzawm a, a vanduai zawkah Spurs an ṭang.

Team pahnihte hi June 14, Pathianni zing dar 6:00-ah an inhmachhawn dawn a, Knicks hi an chak leh a nih chuan 1973 hnua a vawi khat nan an champion dawn.

Spurs erawh insiamṭhat an mamawh a, third quarter leh fourth quarter-ah point 20 an score thei lo ve ve a, dinhmun ṭha zawka ding chungin an inpawhthlaktir leh a, game 5-ah chuan thih leh dam inkar a nih tawh dawn avangin an fimkhur lehzual a ngai tawh ang.