Senesi-a'n Spurs a zawm

Tottenham Hotspur chuan Bournemouth defender Marcos Senesi chu free transfer-in an la lut a, kum 29 mi defender hian July 1-ah official takin Spurs hi a zawm ang.

Argentina tana vawi thum inlan tawh defender Senesi hi Bournemouth lamin chelh tumin vawi tam an dawr a, mahse, contract an zawrh vawi thum ngawt chu a hnar vek!

Cherries-a a contract a hman zawh hnuah Spurs nen indawr zuiin, London club hi a zawm dawn ta. Senesi chuan, "Spurs-in an club tana inlan tura min duhzia an lantir khan, khaw dang ka hawi thei lo a ni," a ti.

World Cup-a Argentina squad-a tel lo defender chuan, "Khelmual ka luh apiangin club tan ka theihna zawng zawng ka hlan dawn a, fan-te hlim taka an awm theih nan theihtawp ka chhuah ang.

"Tottenham tana nomawi chawi ka duh a, chumi tihlawhtling tur chuan theihtawp ka chhuah dawn," a ti a, London khawpuiah nomawi chawi tura a pem thu a sawi.

Spurs hian Liverpool legend, kum 31 mi Andy Robertson chu free transfer bawkin an lo la lut tawh a, kum 33 mi an defender Ben Davies chuan kum khat dang contract a pawtsei bawk.

Tottenham manager Roberto de Zerbi chuan, "Ball chan tam duh team tana a khelhin a talbuai lo a, a game thlir dan a dik a, boruak sangah a talbuai lo bawk," a ti.

De Zerbi chuan sawi zawmin, "Senesi rilru puthmang hi a paukhauh a, hmasawn zel duh mi a nihnate hi ka ngaina hle. Ani nena thawh dun ka châk tawh a, team tana a hnathawh theihte hmuh hlan ka nghakhlel tawh hle," a ti bawk.

Spurs hian contract hmang zo tur midfielder Yves Bissouma chu nipui transfer-ah a chhuah tur thu an tichiang bawk.