Rashford hma hun a chiang lo

Manchester United forward Marcus Rashford hma hun a chiang lo chhunzawm zel a, he thu buatsaih a nih thleng hian Barcelona-in a ngheta lak an tum leh tum loh a la chiang thei lo!

Rashford hian season hman zawh takah khan Barca chu loan-a zawmin, La Liga nomawi a chawipui a, season khat atana a zawm club hian an duh chuan pound maktaduai 26-in a nghetin an la lut thei.

Mahse, Barca hian tun thlengin Rashford chungchangah United an la dawr lo a, khawthlang media ṭhenkhat chuan Anthony Gordon an lei tawh tho avangin Rashford hi a ngheta lakluh an tum dawn lo niin an sawi.

Barca hian Rashford hi a ngheta lakluh an duh a nih chuan June 15 ral hmain Manchester United hi an hrilh a ngai a, mahse, he thu buatsaih a nih thlenga thu leh hla an la neih loh avangin Rashford aiawhte pawhin chhuah an inring tawh zawk.

Spanish media ṭhenkhat chuan, Barca hian an inremna sa aia man tlawm zawka Rashford hi lakluh an duh a, hei vang hian an tikhawtlai niin an sawi a, mahse, Manchester United hian an inremna sa aia tlawma hralh erawh an tum lo.

Rashford hi Manchester United player hlawh tam pawl niin, United-in first team player hlawh tam uchuak ṭhenkhat um bo an tumna kawngah loan-in an chhuahtir a, kum 2028 thleng contract a la nei.

United boss ban tak Ruben Amorim khan Rashford hi chhawr duh loin, 'bomb squad' an tih zingah a tel a, mahse, United coach nghet ni ta Michael Carrick nen erawh player a nih laia inkhel dun hmanin, kum 2021-a Carrick-a'n United a enkawl lailawk khan a hnuaiah a khel hman bawk.

Carrick hian April-a Rashford-a chungchang zawh a nih khan, English forward hma hun a chian loh thu a sawi a, "Kan club-a player kan kawl apiang chu ka thawhpui duh vek a ni," tiin a sawi bawk - United-ah a kir lo ang tih a sawi theih ta loh.

Kum 28 mi Rashford hian season hman zawh takah khan Barcelona tan inelna hrang hrangah match 49 khelin goal 14 a khung a, assist vawi 14 a nei tel. Barca tana a khelh ṭhat avangin World Cup-ah pawh England aiawh tura koh a ni.