Nomawi inchuh tur Hunthar leh Khawbel

Mizoram Rural Bank Pro Volleyball League final chu zaninah khelh a ni dawn ta. Vawi li final lut tawh Hunthar leh a vawi khat nana final lut Khawbel te an inhmachhawn dawn.

Inkhel hi dar 8-ah ṭan a ni ang - a hmuna en man hi Rs. 50 chauh niin ṭhutna ṭha duh tan chuan kal hma a fuh ang. LPS YouTube channel-ah(member only) en theih a ni dawn bawk.

Pangana beiseitu

Hunharin tun season an hmang ṭha a, Uttar Pradesh aṭanga an lak Suryansh Tomar a khel ṭha a, Suuryansh hi 2024 Mizo best player Fabian Lallunghnema nen an inthlawp ṭha ṭhin hle.

Anni bakah hian Mizo player langsar Wilson Lalremruata leh Lalbiakmuana te an la nei bawk a, captain Remsangzuala (Lalmama) an la nei cheu. Lalmama hi setter ni mah se Mizo best player dawng thei zingah chhawpchhuah a ni.

Hunthar hian league round-ah Thutak Nunpuitu Team chiah an hneh lo a, hmahruaitu ni chunga league round an khar theih avangin a vawi nga nan champion an inbeisei.

Khawbel thar

Season tirah che ṭha mah se Khawbel hi a laklawhah an tlahniam deuh a, Delhi player Anurag Rawat nei mah se 'risk' lain Angamuthu Ramaswamy an la a, an tisual lo. Angamuthu hian match thum a khelh tawhah Player of the match lawmman a dawng vek a, pahnihnaah Khawbel a hlang kai.

State pawn player bakah Johan Vanneihsanga lakah beisei a sang dawn a, Khawbel chhulchhuak Johan hian final an luh thlengin point 126 a hmu tawh a, Mizo zinga point hlawhchhuak hnem ber a ni.

Engtin zel

Team pahnihte league round-a an inhmachhawn khan, Huntharin 25-15, 25-19, 25-19 (3-0) in hnehna an chang a, Khawbelin set khatmah an la ve lo. Mahse Angamuthu awm hnuah Khawbel an ṭha sawt a, semifinal-ah champion lai Anastasia Electric Veng an hneh avangin Hunthar tan zuam chi an ni tawh dawn lo.

Khawbel an champion a nih chuan Mizorama Volleyball inelna sang bera an vawi khat champion-na tur a ni a, champion ngei tumin an khel bawk ang.

Hetihlai hian vawi li lo champion tawh Hunthar an ni a, vawi nga nana nomawi beiseitu hian an ban phak maia champion nomawi awm chu thlauh an duh dawn bik lo a, inkhel hmuhnawm a beisei ngam.