Switzerland hmaah Lopetegui 'Qatar'

Zanin dar 12:30 hian California-ah Switzerland leh Qatar te an inhmachhawn dawn. Murat Yakin kaihhruai Switzerland hi team ṭha zawka ngaih ni mah se Qatar hi Real Madrid manager hlui Julen Lopetegui enkawl tih hriat a ṭha.

Qatar hian inelna hnuhnung ber an thleng a; Netherlands, Senegal leh Ecuador te nen group khatah awmin point khat pawh an hmu lo. Lopetegui hnuaiah Qatar-in result ṭha zawk neih an tum dawn a, chutihrualin nikum leh kumin bikah nikum October thlaa UAE an hneh chiah kha chak hmel an hmuh awmchhun a ni.

Switzerland erawh Xherdan Shaqiri, Yann Sommer leh Fabian Schar ten ram tana inkhelh chawlhsan mah se Manuel Akanji, Ricardo Rodriguez leh Granit Xhaka te an la awm. Tun hma deuha an striker pawimawh Breel Embolo pawh squad-ah awm mah se bul ṭan ngei tura ngaih a ni tawh lo.

Embolo aiah Burnley striker Zeki Amdouni-a'n bul a ṭan a rinawm zawk. Kum 25 mi Amdouni hian ram tan match 29 khelin goal 11 a khung. Switzerland hian World Cup khel tura an zinchhuah hmain St Gallen-ah Jordan 4-1 in an sawp a, San Diego-ah erawh Australia nen 1-1 in an inhnehtawk. Qatar lakah Murat Yakin hote chesual ve thei tho an ni.