Inkhel pawimawh Ivory Coast vs Ecuador

FIFA World Cup Cup-ah June 15, Thawhṭanni zing dar 4:30 hian Ivory Coast leh Ecuador te an inkhel dawn a, team intiat tawk inkhel a nih avangin a chak zawk tan second round luhna kawng a inhawng zau dawn. Tun hmain ram pahnih hi an la inhmachhawn ngai lo a, Philadelphia-ah a vawi khat nan an intawng dawn.

Ivory Coast-in Didier Drogba bakah Toure te unau nei tawh lo mah se captain Franck Kessié-a'n hoin Nicolas Pépé, Ibrahim Sangaré, Simon Adingra, Guéla Doué, Amad Diallo leh Yan Diomande te an kawl a, Europe club lian tan pawha hmachhawn châkawm loh an ni.

Emerse Faé hote hian World Cup hmain champion rinkai zinga mi France bakah Scotland leh South Korea te an hneh a, inelna hmachhawn turin an inringtawk dawn. Les Bleus an hmachhawn ṭumin Guéla Doué-a'n goal a khung a, ani hi France player pawimawh Desire Doue nau a ni.

Ecuador lam hi ranking-a sang zawk an nih bakah South America aṭanga World Cup khel tur zawnnaah anmahni aia che ṭha chu Argentina chauh an awm. Tlarhnungah Champions League-a PSG champion puitu defender Willian Pacho-a'n a ho thei a, Arsenal defender Piero Hincapié awm bawkin midfield-ah pawh Chelsea innghana Moisés Caicedo an la nei cheu. Tlarhma lamah captain Enner Valencia-a'n a la ho thei a, Ivory Coast tlarhnung tan a hnawksak pha ang.