Australia vs Turkey - A en tlak dawn

Asia khawmualpui aṭanga World Cup khel tura inpetkai Australia chuan Pathianni zing dar 9:30-ah an match hmasa ber an khel dawn a, Turkey an hmachhawn dawn - team pahnih an intiat tawk a, inkhel a hmuhnawm ang.

Group D-ah hian Australia leh Turkey bakah hian inelna thlengtu USA leh Paraguay an awm tel a, an intiat hlawm hle. Hei vang tak hian knockout stage luh a harsa dawn tihna a ni a, vawi khat chetsual a pawi thui thei dawn.

Tun hmaa Tim Cahill, Harry Kewell leh Mark Viduka te nei ṭhintu Australia hian player langsara chhal tur an nei ta meuh lo a, kum 34 mi keeper, Levante tana khel Mathew Ryan hi a langsar deuh ber niin a lang ta!

Hetihrual hian Serie A club Parma centre back Alessandro Circati, Feyenoord left back Jordan Bos, Norwich City striker Mohamed Touré leh tawnhriat nei ṭha Mathew Leckie te ho an kawl a, Turkey laka zam tur chu an ni bikin a lang lo.

European top team zinga chhiar tel rem lo mah se, Turkey an ṭha thawkhat a, Australia hi chu an point hmuh theihna turah an ngai hial ang - tlarhnungah ringawt pawh AS Roma right back Zeki Çelik, Al Ahli centre back Merih Demiral leh Fenerbahce centre back Caglar Soyuncu te ho an kawl.

Captain Hakan Çalhanoglu hi inkhela danglamna thlen thei khawpa player ṭha bik a ni a, Real Madrid attacking midfielder ṭhangduang Arda Güler, Juventus forward Kenan Yildiz leh Fenerbahce winger Kerem Akturkoglu te an nei bawk - Australia tan fimkhur a ngai.