Koeman-a Netherlands hmaah Japan

Ronald Koeman-a enkawl Netherlands chuan Pathianni zan dar 1:30-ah, Asia team ṭha Japan nen an inhmachhawn dawn a, team pahnihte tan kumin World Cup-a an match hmasa ber tur a ni a, group F inkhel hmasa ber tur a ni bawk. Player an neih ṭhat bakah an team hmuhnawm an nih avangin en tura men rei a sual lo ang.

Tun hma aṭanga football thiam ram tia hriat ṭhin ni mah se, Netherlands tlakhniam lai tak a ni a, Europe club liana khel phak nei tho mah se kum dang World Cup an pha lo tih hai rual a ni lo.

Si ban nghak turin Brighton & Hove Albion keeper Bart Verbruggen chu an first choice a ni a, tlarhnungah captain Virgil van Dijk-a'n a ho dawn a, Denzel Dumfries, Jan Paul van Hecke leh Micky van de Ven te an din leh a rinawm.

Midfield-ah Frenkie de Jong leh Ryan Gravenberch te an inkawp leh a beiseiawm a, Manchester City midfielder Tijjani Reijnders a awm bawk. Tlarhmaah erawh kum dang aiin an bil deuh a, West ham winger Crysencio Summerville, Donyell Malen leh Cody Gakpo te chu an din tlar leh hmel. Malen hi an goal khung tura an hmachhuan ber a ni dawn.

Kum 27 mi Malen hian season hman zawh takah khan, thlasik transfer-ah Aston Villa aṭangin AS Roma loan-in a pan a, season chawhnu lam chauh khel hman mah se goal 14 khungin Lautaro Martinez (18) chiah a tluk lo a, Netherlands tan innghahna tlak a nihzia pholan a tum ang.

Anni bakah hian Memphis Depay, Sunderland forward Brian Brobbey leh Noa Lang te an la awm a, veteran striker Wout Weghorst an la kawl bawk. Oranje hi champion tura rinkai harsa deuh mah se, Japan lakah team ṭha zawka ngaih an la ni tho a, awlsam taka tlawm mai an duh dawn lo.

Hetihlai hian Japan-in thu lawmawm lo an nei a, an captain Wataru Endo chu a a ke veilam hliam avangin World Cup-ah a inlan thei dawn lo a, chawpchilh takin a aiah Borussia Monchengladbach striker Machino Shuto koh a ni a, Endo hian ram tan inkhelh a chawlhsan zui nghal.

Endo hma hian Samurai Blue (Japan sawina) hian Karou Mitoma leh Takumi Minamino te chu hliam vangin an lo chân tawh a, Premier League-a tawnhriat nei player pathum ngawt an chhawr thei lo tur hi Japan tan channa nasa tak a ni.

Mahse Japan hi hlauthawng tur an ni lo a, postition tinah club langsar tana khel pha an la kawl. Goal veng turin Parma keeper Zion Suzuki a awm leh dawn a, Suzuki hmaah Bayern Munich defender Hiroki Ito leh Arsenal defender hlui Takehiro Tomiyasu te an la ding thei dawn.

Midfield-ah Crystal Palace player Daichi Kamada leh La Masia chhuak Takefusa Kubo te an nei bawk a, anni hian season liamtaa Feyenoord tan goal 24 khungtu Ayase Ueda an chawm dawn a, team lian zawk barakhaih leh turin theihna sang tak an la nei a ni.