Pathianni zinga inlan tur Scotland

Kum 1998 hnua a vawi khat nan Scotland-in World Cup an khel dawn a, Pathianni zing dar 6:30-ah an match hmasa ber an khel ang - an hmachhawn tur hi Haiti an nih avangin Scottish team tan chak a beisei ngam.

Scottish team hi captain Andy Robertson hoa inlan tur an ni a, Napoli thiampuipa Scott McTominay leh Aston Villa captain John McGinn an neih tel bawk avangin an inringtawk khawp ang.

Scotland hian an inrintawkna belhchhah turin, World Cup inbuatsaih nana match hnih an khelhah hnehna an chang ve ve - an chak a ni satliah lo a, goal riat ngawt khungin, an lamah goal khat chiah a lut.

Steve Clarke enkawl Scotland hian anmahni ang thoa World Cup khel tur Curacao chu 4-1 in an sawp a, Bolivia chu 4-1 in an hneh bawk. Inringtawk tak chungin World Cup an hmachhawn dawn tih a chiang.

Hetihrual hian player pawimawh McTominay chu pum na vangin a buai a, he thu buatsaih a nih lai hian a inlan theih dawn leh dawn loh a la chiang lo.

Scotland hian Brazil leh Morocco an la hmachhawn dawn avangin Haiti laka point thum hmuh ngei ngei a ṭul a, Haiti lakah pawh an chak zo lo a nih chuan World Cup knockout stage luh beisei chhunzawm a harsa ang.

Hetihrual hian Haiti pawhin Scotland thlir ang thoin he inkhel hi an thlir dawn - Brazil leh Morocco laka chak tum ai chuan Scottish team laka point thum hlawhchhuah a awlsam zawk an beisei dawn a, attacking football beisei a sual lo mai thei.

Haiti hian kum 1974 hnua a vawi khat nan World Cup hi an khel dawn a, ram tana match 82-a goal 44 khungtu, Kerala Blasters forward hlui Duckens Nazon hi tlarhmaa an innghahna tur a ni.

MLS club Toronto FC winger Derrick Etienne Jr, Super Lig club Caykur Rizespor forward Frantzdy Pierrot leh Sunderland striker Wilson Isidor te hi an innghahna tur an ni dawn a, inkhel hmuhnawm a beisei ngam ang.