Japan captain Endo a inhnukdawk

Liverpool midfielder Wataru Endo chu hliam vangin Japan World Cup squad aṭangin a inhnukdawk a, Japan captain hian ram tana inkhelh a chawlhsan thu a puang zui - Japanese mipui tana thil hriat nuam lo ber pawl a ni hial ang.

Kum 33 mi Endo hian a ke phahah hliam neiin, February aṭang khan Reds tan chuan a inlan tawh lo. Mahse, World Cup-ah a dam hman beiseiin, squad-ah telh a ni tho a, May thla tawpa Iceland nena friendly match an khelhah chuan first half a khel.

Mahse, World Cup ṭan dawn tak takah Endo a dam hman lo a, ram tana match 73 khela goal li khungtu hian international football a chawlhsan thu a puang ta zawk - a aiawh tur hian Borussia Monchengladbach striker Shuto Machino chu koh a ni.

Kum 2015-a Japan tana a match hmasa ber kheltu Endo chuan, "Ka inhliam aṭang khan ṭha taka inenkawlin, ram tana inlan leh ngei tumin ka bei a, ka theihna zawng zawng ka hlan avangin ka inchhir lo hle.

"Japan team kan neih mek hi team danglam tak an ni a, harsatnate paltlangin, Japan national team-a kan la hmuh ngai loh hi min hmuhtir ang tih ka beisei tlat a ni," a ti.

Endo hian ram tana inkhelh a chawlhsan thu puang zuiin, "Tunah chuan ram tan inkhelh ka chawlhsan dawn ta a, Japan national team fans tam tak zinga mi pakhat ni vein, he team hi khelmual pawn aṭangin ka lo ṭan ve tawh dawn a ni.

"Japan national team hian eng tikah emaw chuan World Cup nomawi kan la chawi ang tih ka ring a, chumi ring tlat chung chuan i thlawp tlat ang u," a ti a, an ram team ṭan turin Japanese mipuite a sawm nghal.

Japan hian hliam vang thoin Brighton & Hove Albion forward Kaoru Mitoma chu World Cup-ah hian an hruai thei dawn lo bawk a, an player neih ṭhat pahnih tel loin World Cup hmachhawn a ngai dawn a ni.