Kum 2026 NBA Champion New York Knicks

New York Knicks chuan nimin zing khan, NBA Finals game 5-ah 94-90 in San Antonio Spurs an hneh a, kum 50 chuang an nghah hnuah NBA champion an ni leh ta. Knicks hi best of seven series-ah 4-1 a chak zawkin an champion.

Wemby block show

Frost Bank Center, San Antonio-a inkhelah Spurs-in bul an ṭan ṭha zawk a, Victor Wembanyama a langsar nghal. Wemby hian point hmasa ber a score hnu lawkah a zawnin Karl-Anthony Towns leh OG Anunoby te a block. Dylan Harper che ṭha nghal bawkin, first quarter-ah 23-13 in hma an hruai.

Second quarter-ah pawh Wemby a che ṭha chhunzawm a, inkhel an ṭan chiah tihah Jose Alvarado a block leh nghal a, Landry Shamet-a 'lay up' chu a ben thlaksak bawk a, vawi nga block nei nghal derin, a team a tiphur hle.

Wemby, Julian Champagnie leh De'Aaron Fox ten three points an lut a, mahse, Knicks tan Jalen Brunson, Mikal Bridges leh Josh Hart ten an chhang let a, 42-37 in an inthlauhna tihniamin chawlhlawk an hmang.

Knicks an 'comeback'

Third quarter-ah Knicks-in point score lamah hma an sawn hret a, Brunson, Bridges leh Hart bakah Jordan Clarkson te kut kal lai a ni. Spurs tan Champagnie leh Fox te kut kal a la reh bik lo a, Wemby-a'n a khat tawkin a score thei bawk. Team pahnihten point an inneih chhawk zak zak hnuah 72-65 in Spurs-in hma an hruai a, an khelh dan enin game 5 an lak mai hmel.

Mahse, beisei ang ngawtin thil a thleng lo a, Knicks tan Brunson, Hart leh Shamet ten three points an vawm lut nghal a, Spurs-in chhanglet mah se an kut kal lai a tawp. Brunson a inlar chhunzawmin, a teammate ten 'free throw' an hlawhchhuah an hmang ṭangkai a, Spurs lehthalin, kum 1973 hnua a vawi khat nan an champion.

Brunson a thiam ber

Finals MVP-ah Knicks point guard Jalen Brunson chu thlan a ni a, kum 29 mi Brunson hian finals game nga an khelh chhungin match tinah point 32.6 leh assist 4.6 nei ang a ni a, game 5-ah bik point 45 neiin MVP nih a phu hle.

Spurs erawh third quater thlengin hmahruaitu ni mah se, fourth quarter-a an inthlahdah an tuar. Game 4-ah Spurs hian point 29-a hmahruai chungin an inlehthal tir tawh a, anmahni ngeiin champion nomawi an thlauhah a ngaih theih.