France hmaah African champion?

FIFA World Cup 2026-ah champion rinkai zinga mi France -in zanin dar 12:30 hian African champion 'dik tak' Senegal an hmachhawn dawn. Senegal hian kumin January khan Africa Cup of Nations final-ah Morocco hnehin nomawi chawi mah se March 16-ah CAF Appeal Board chuan thutlukna thar siamin Morocco chu 3-0 a chakah an puang.

Official-in Senegal hi African champion ni tawh lo mah se a hun laia nomawi chawitu an ni a, khelmual pawn lamah pawh thawm an la nei ve reng. Morocco-in an match hmasa berah Brazil lakah ṭha takin an khel a, 1-1 in an inhnehtawk. Inkhelh hmain Achraf Hakimi chuan, " Brazil of Africa," tiin a inchhal.

Hemi changchang hi Senegal thiampuipa Sadio Mane chuan sawiin, "Khawi aṭangin khatiang thu te an dawn aw. Kan awmnaah chuan African rukru tiin an hria. Brazil tih tur khawpin an khel a hmuhnawm loh. Jay Jay Okocha emaw El Hadji Diouf emaw anga player ṭha an thawh lo. Brazil of Africa tih tur chu Senegal emaw Nigeria emaw an ni," tiin an nomawi chhuhsaktute a dim lo hle.

Senegal hi Africa ram zinga ṭha bera chhal ngam an ni a, qualifying round-ah hneh loh an tawng lo. Nikum June thla khan Wembley Stadium-ah England 3-0 in an sawp thei a, chutihrualin World Cup hma friendly match-ah erawh United States an hneh lo a, Saudi Arabia nen goal awm loin an inhnehtawk bawk.

Mane hian Senegal tan goal 55 a khung tawh a, Al Nassr forward thlawp tur hian Ismaïla Sarr, Nicolas Jackson, Idrissa Gueye leh Iliman Ndiaye te an awm a, Europe-a tawnhriat nei ṭha tak vek an ni. Chutihrualin France erawh World Cup hnuhnung pahniha final lut thei an ni a, Les Bleus aia squad chhah ṭha chuang an awm lo.

Kylian Mbappe-a'n Real Madrid lama season hman ṭhat tawk loh thup nan World Cup hman ṭangkai a tum dawn a, Ballon d'Or kawltu Ousmane Dembélé leh Bayern Munich midfielder theihna nei sang Michael Olise te an awm bawk avangin an goal bawh pawh a na dawn. Player ṭha rual enkawl tur hian captain leh coach anga World Cup chawi thei Didier Deschamps an kawl bawk.

Deschamps chuan, "Player tumah hi team aia lian an awm lo. Goal venhim dan kan thiam lo a nih chuan kan khel thei lo ang. Mbappe pawh a tel a, tlarhnung puih a tum lo a nih chuan bench-ah a ṭhu ang," tiin a sawi a, a ṭawngkam hman dan aṭangin hruaitu ṭha bik a nihzia a pholang.