Real defender thar Cucurella

Spanish club lian Real Madrid chuan World Cup laiin transfer bazar lamah thawm an lo nei ve reng a, Chelsea defender Marc Cucurella chu pound maktaduai 51.8-in an la lut.

Kum 27 mi Cucurella hian Santiago Bernabeu-ah hian kum ruk chhung khel turin contract a ziak dawn a, a man zat atan Real hian pound maktaduai 47.5 an pe phawt ang - a khelh ṭhat dan a zirin £4.3mtd hi pek belh leh tur a ni ang.

Cucurella hian kum 2022 khan Brighton & Hove Albion aṭangin Blues hi £63mtd-in a zawm a, player pawimawh zingah a tel nghal - match 163 khelhsakin, goal kua a khung a, assist vawi 13 a nei.

London club tan hian Europa Conference League leh FIFA Club World Cup-ah nomawi a chawi bawk a, a inzir chhuahna Barcelona-a kir tur anga sawi a awm hman a, Atletico Madrid hming a ri bawk.

Mahse, a tawpah chuan Real zawk a pan ta. Stamford Bridge-a kum thum cham tura contract la nei fullback hi Spanish club hoin an duh tih a chian khan, Chelsea hi an ṭang ṭung lem lo.

Cucurella hian season hmasa lawk khan contract rei zawng pawtsei loin, a hlawh titam turin contract thar a ziak - hei vang tak hian Blues hian a man phu tawka dawrtu an awm a nih chuan chhuahtir an pawi ti lo nia sawi a ni a, Spain lamah a kir ta.

Spain tana World Cup khel tura fehchhuak mek Cucurella hian March international break-ah khan a club khelhna Chelsea thuneitute chu a lo sawisel tawh a, Enzo Maresca ban chungchang a sawi.

Blues player zingah Maresca chhuah avanga lungawi lo, Spanish ṭawng hmang engemaw zat an awm nia sawi a ni a, amah thlaktu Liam Rosenior hnuaiah beisei angin a khel zui lo bawk.

Chelsea hian Rosenior banin, season thar atan Xabi Alonso chu coach thar atan ruai mah se, Cucurella erawh a chhuak ta tho - Real boss hlui Alonso-a'n Chelsea-ah hnathawh tur a ngah nghal hle!

Real hian President atana Florentino Perez an thlan nawn hnuah thawm an nei na hle. An coach hlui Jose Mourinho an la let a, Manchester City chhuahsan hlim Bernardo Silva pawh an la lut hnai tawh niin an sawi.

Hei mai a ni lo - Inter Milan fullback Denzel Dumfries pawh an chang ngei dawn nia sawi a ni a, Liverpool chhuahsan hlim Ibrahima Konate pawhin Santiago Bernabeu lam panin a puanthuah a tel ang.