Sweden tan Isak leh Gyokeres an vul

English Premier League duo Alexander Isak leh Viktor Gyokeres te chuan Sweden tan goal khat ve ve khungin Tunisia chu 5-1 in an hneh a, kumin World Cup-ah ṭha taka bul ṭanin group F-ah hmahruaitu an ni.

Thawhṭanni zing inkhelah Sweden tan Isak leh Gyokeres bakah Yasin Ayari chuan goal hnih a khung a, Mattias Svanberg chuan goal khat a khung ve bawk. Tunisia tan Omar Rekik a goal khung chu scoreline timawitu chauh a ni.

Estadio Monterrey-a inkhelah Sweden an nung nghal a, minute sarihna lekah Ayari-a'n dan rual loha kawhin a pet lut a, Sweden hma a hruaipui. An la duhtawk mai lo a, Isak chuan Gyokeres-a ball pek chu um lutin goal kilah tak a pet lut a, an hmahruaina a belhchhah.

Goal an chhuah hnuah Tunisia-in Sweden phur lai an vawi dai a, minuite 42-naah Manchester United midfielder hlui Hannibal Mejbri cross satliah chu Rekik-a'n tauh lutin an siphurh a sut ṭhen. Rekik hi Swedish defender Alexander Bernhardsson-a'n a veng ṭha tawk lo.

Second half-ah erawh Sweden an chung nung zawk a, minute 59-naah Tunisia midfielder Ellyes Skhiri tihsual nangchingtu Isak chuan Gyokeres tan a pe a, Arsenal forward hian goal-a chantir turin harsatna a nei lo. Isak leh Gyokeres an inman takzet.

Sweden tan Svanberg chuan minute 84-naah a substitute aṭanga lutin a pet goal nghal a, offside ham zet mah se VAR hmanga ennawn a nih hnuah goal-ah pawm a ni a, 4-1 in Sweden-in hma an hruai.

Injury time-ah Ayari bawk a inlar leh a, box pawn aṭangin a ball hmuh chu kawh zetn goal kilah a pet lut nghal a, Tunisia keeper Mouhib Chamakh tan dan ngaihna a awm lo a, nuamsa takin Sweden an chak.

Sweden hia June 20, Inrinni zan dar 10:30-ah champion sawi ri ngam Netherlands an hmachhawn dawn a, goal an khung hnem avangin an inringtawk sawt ang.