Barcelona-ah Hamilton a tlan chak ber

Pathianni zan Barcelona-Catalunya Grand Prix-ah Lewis Hamilton chuan hnehna a chang a, Ferrari a zawm hnua pakhatna a nih vawi khatna a ni. Kum 41 mi Hamilton hi F1 inelnaa hnehna chang thei upa zingah pasarihna a ni bawk.

Circuit de Barcelona-ah a tir aṭangin Hamilton a che ṭha nghal a, a tawp a khar ṭha bawk. Pahnihnaah Mercedes driver George Russell a thlengin Hamilton chiah a tluk lo a, McLaren driver lando Norris chuan pathumna a hauh.

A zawna vawi nga chak thei Andrea Kimi Antonelli erawh lap 62-naah a car engine chian loh avangin a buai a, a tlan chhunzawm theih loh avangin a zawnin vawi ruk a chak thei dawn ta lo. Palinaah tun hnaia chanchin ngah tak Max Verstappen a thleng bawk a, Dutch driver hnungah hian Oscar Piastri leh Isack Hadjar te an thleng.

Hamilton a chak avangin October 2024 hnua a vawi khat nan Ferrari an chak a, tun season bikah Mercedes tih loh team dang zingah hnehna chang hmasa ber an ni bawk.

Season bul ṭanna Australian GP-ah khan British driver Russell chuan hnehna a lo chang tawh a, hemi hnu hian Antonelli tluk theitu an la awm lo a, Monaco GP thleng khan pakhatna a ni char char.

Hetihlai hian Barcelona GP-ah driver pariat laiin a tawp an khar thei lo a, Antonelli bakah Aston martin driver pahnih Fernando Alonso leh Lance Stroll te chu hming langsar an ni a, Hamilton-a teammate Charles Leclerc a tel bawk.

Ferrari driver Hamilton chuan, "Ka taksa a fit theih nan ṭum dang aia hahthlakin ka inbuatsaih. Mahni inrinhlelh loh miah loh tur a ni a, nangmah leh nangmah i inrintawk a ngai. Keipawhin ka nihna ngaia kir leh turin ka rilru hi a bul aṭangin siamṭha leh a ni," a ti.