Liverpool-in nomawi pakhat an mangṭha leh ta!

Premier League hmahruaitu Liverpool-in treble champion an beisei thei tawh lo - Thawhṭanni zan khan Wolverhampton Wanderers chu FA Cup third round-ah 1-2 in an ngam lo a, FA Cup an mangṭha. 

European club lian ten an ngaihhlut em em 'treble champion' ni tur hian mahni rama cup competition inelna sang ber bakah league leh Champions League nomawi chawi a ngai a, FA Cup-a an tlak tak avangin  Liverpool tan treble a beisei theih tawh lo. 

Liverpool hi League Cup-ah an tlak tawh bawk avangin Premier League leh Champions League chu tun season atana an beisei theih awmchhun a ni tawh a, squad chhah tawk loh ngaihtuah chuan Liverpool fans ṭhenkhat chu an lawm zawk hial mai thei. 

Thawhṭanni zana inkhelah hian Wolves tan Raul Jimenez leh Ruben Neves te chuan goal khat ve ve an khung a, Reds tana Divock Origi goal khungin awmzia a nei thui lo. 

Liverpool boss Jurgen Klopp-a'n game hautak an khelh zawn nasat avangin FA Cup-ah player naupang rual a chhawr a,  league match hnuhnung bera Manchester City nena inkhel starting XI aṭangin player pakua ngawt a thlak danglam. 

Kum 17 mi  midfielder Curtis Jones leh kum 18 mi Rafael Camacho chu inkhel bul ṭantu zingah an tel a, defender Dejan Lovren chu minute rukna lekah lakchhuah a ngaih avangin kum 16 mi defender Ki-Jana Hoever chu luhtir a ni bawk. 

Minute rukna leka Reds tlarhnung en chuan left back  Alberto Moreno chu defender pangngai leh tawnhriat nei awmchhun a ni. Fabinho chu centre back-ah chhawr niin Hoever nen an inkawp a, right back-ah kum 18 mi Camacho dah a ni bawk.

Mahse, Wolves hian tawnhriat nei tlem Liverpool tlarhnung erawh an ṭhiat lawk thei lo - minute 38-naah erawh Raul Jimenez chuan goal hmahruai a khung a, khelmuala Reds player tawnhriat ngah ber James Milner tihsual aṭanga lut a ni. 

Minute 51-naah Liverpool-in beiseina an chhem nung thar ve leh a,  Divock Origi chuan mawi zetin si phurh sutna goal a khung - Liverpool-in target zawna an pet hmasak ber a ni a, an phur thar. 

Mahse, Liverpool fan-te an phur rei lo. Si phurh sutna aṭangin minute li a liam hman chauh tihah Neves a inlar ve thung a, Portuguese midfielder, long range shot larpuitu hian yard 30 vel aṭangin goal hnihna a khung. 

Jurgen Klopp-a'n player siksawi nual mah se chak loh a tum lo. Hun tawp nan minute 20 chiah a awm tawh tihah chak beiseiin Mohamed Salah leh Roberto Firmino te a luthtir a, mahse danglamna an thlen hman lo. 

Liverpool boss Klopp chuan, "Engkima mawhphurtu chu keimah ka ni," tiin an chak loh chhanah puh tur an awm loh thu a sawi a, mawhphurhna a la. 

Liverpool boss Klopp chuan, "A chang chuan thutlukna siam sual fe fe hi ka nei ve fo a, hetiang hun hi tawn chang a awm a ni," tiin player a siksawi nasa lutuk chu an tawrh thu a pha lo. 

Klopp chuan player a chawlh ṭhentir chhan erawh sawifiah nghalin, "Hun chep leh harsa tak karah Arsenal leh Manchester City kan hmachhawn a, kan tan chuan a harsa em em a ni. 

"City nena kan inkhelh zawh hnu lawkah khan ka player zinga pali emaw panga chu an dam lo nghal hial a ni. Kan theihna zawng zawng kan pe a, player-te khan inrintawkna nei se kan duh a, mahse tun ṭum chu a fuh lo a ni," a ti. 

English legend Alan Shearer chuan, "Liverpool ka hriat ṭhin chuan nomawi awm zawng zawng chawi an duh ṭhin a, engvangin nge he thil hi tunah a danglam ang?" tiin Reds chu chak tum tawk loah a ngai.

Liverpool defender Dejan Lovren chu hliam vangin lakchhuah a ni a, he thu buatsaih a nih thleng hian Croatian defender hi engtia rei nge a chawlh dawn a la hriat loh. 

Klopp chuan, "A malpuiah hliam a nei a, a hmain insawiselna engmah a nei lo," tiin a sawi a, a hliam dinhmun dik tak erawh a sawi chiang lo thung. 

Lovren thlak tura luhtir Hoever kha kum 16 mi chauh a la ni a, nipui lai khan Liverpool hian Ajax aṭangin an lalut a, Thawhṭanni zan a inlan khan Liverpool player zinga FA Cup inlan naupang ber a  ni a, Reds tana inlan thei naupang pathumna a ni bawk. 

Hoever hian a khel ṭha takzet a, amah ang thoa kum 20 la tling lo pahnih Camacho leh Jones te khan hmabak eng tak an nei tih a sawi ngam.