MATA-in medal lak lawmna hmang

Mizoram Amateur Taekwondo Association (MATA) chuan June 13, Inrinni khan tun hnaia an hlawhtlinna hrang hrangte an lawm a, MSSC Conference Hall, Hawla Indoor Stadium, Republic Vengthlanga medal lak lawmnaah hian Lt.Col.Clement Lalhmingthanga, MLA chuan khuallian niin a telpui.

MATA hnuaia infiammite hian May leh June thla chhung khan Mizoram awiahin medal 63 ngawt an la a, 12th National Open Taekwondo Championship, New Delhi-a neihah khan gold 15, silver panga leh bronze pasarih an la a, a che ṭha hle.

2nd Meghalaya Open National Taekwondo Championship, Shillong-a neihah pawh khan gold pasarih, silver leh bronze pathum ve ve an la a, 1st Sikkim Open International Taekwondo Championship-ah gold 10, silver pali leh bronze pathum an la thung.

MATA chuan an hlawhtlinna chu player-te thawhrah a nih piahlamah, nu leh paten tha leh sum tam tak an senna rah a nih thu an sawi a, MATA-in Fight League a lo buatsaih tawh tawnhriat an chhawr thu pawh sawiin, MATA thawh hona ṭha tak vang a nih thu an sawi tel bawk.

Hetihlai hian MATA chuan, state dangin an neih vek tawh electronic scoring system Mizoramin kan la neih loh avanga thiamna tlakchham an la neih thu an sawi tel.