Politics-in World Cup nawmna tibo - Taremi

Iranian striker Mehdi Taremi chuan tun hnaia politics leh indona vangin, World Cup hlutna leh nawmna a bo thu a sawi a, USA leh Iran indona chuan harsatna a siam nasat thu a sawi bawk.

Inter Milan striker hlui Taremi chuan, "Hetiang boruak hian World Cup hlimawmna tur zawng zawng a tichhia, kan lo thlen hma aṭang tawh khan buaina a awm dawn tih ka hre lawk sa tawh a, a thleng ta reng bawk.

A tirah Iran hi Tucson, Arizona-ah World Cup an khelh chhung atan inkulh mah se, USA ramri bula awm Tijuana, Mexico khawpuiah an sawn a, hei hi visa chungchang leh buaina thleng thut thei bakah, politics boruak inlumlet nasa tak avang thleng a ni.

Group stage-a Iran match zawng zawng hi USA khelh a ni dawn a, an inkhelh niah bak America leilungah an awm phalsak an ni dawn lo a, an inkhelh zawh niah vek hian Tijuana an pan leh nghal zel dawn.

Iran manager Amir Ghalenoei chuan, "Hetiang thil thleng avang hian football nawmna a tibo a ni. Football hi chuan hnam hrang hrang te hi a inlungrualtir tur a ni a, hlimna thlen tur a ni. Heng harsatna hian kan rilru a la peng ngei mai, mahse kan player ten inkhelh chauh an rilruah an dah theih nan theihtawp ka chhuah tlat a ni." a ti.

Iran hi group G-ah Belgium, Egypt leh New Zealand te nen an awm ho a, Europe-a khel phak player an kawl hnem bakah Asia no. 2 leh world ranking-a no. 20 ni thei an ni a, pathumnain round of 32 an paltlang theih tawh bawk avangin beiseina sang tak an nei ang.