AC Milan-in Amorim an duh

Italian club lian AC Milan chuan season thara head coach tur an melh mek a, coach hrang hrang zingah Ruben Amorim-a hming ri ring berin, Portuguese coach hi Massimiliano Allegri thlak turin an duh.

Kum 41 mi Amorim hian hlawhtling taka Sporting a enkawl hnuah Manchester United a zawm a, mahse result ṭha a neihpui theih loh avangin thla 14 hnuah ban a ni a, kumin January aṭang khan club enkawl a la nei leh lo.

Portuguese coach aiawh leh Milan hian inbiakna an nei tawh a, thuchiang engmah la awm lo mah se kum hnih leh a chanve daih contract a ziak dawn nia sawi a awm. Milan hian Allegri thlak turin Andoni Iraola, Oliver Glasner leh Mauricio Pochettino te chu an duh zingah an tel a, mahse a tawpah Milan hian Amorim-a lam an hawi.

March thla thleng khan Milan hian Serie A-ah champion an la inbeisei a, mahse an league match hnuhnung 10-ah vawi thum chauh an chak. Season tharah Milan hi Champions League khel turin an tling lo a, an coach Allegri-a'n nen an inṭhen ve nghal.

Amorim-a'n Milan a enkawl dawn a nih chuan a hna a awlsam dawn lo a, an ropuina rama Milan hruai kir leh tura an duh dawn avangin 'pressure' a tam dawn.