China leh South Korea an chak

Asian Cup 2019 a hmuhnawm zel a, Thawhṭanni zan inkhelah China leh South Korea ten hnehna chang nghal mah se point thum hmu turin vanneihna an mamawh tel. 

China-in Kyrgyzstan goalkeeper chet fuh tawk loh chhawr ṭangkaiin goal hnih an khung a, si phur hmasa mah se Kyrgyzstan chu 2-1 in an hneh hram.

Group C-a team pali te hi an intluk tawk dan enin he group hi a la ngaihnawm chho dawn chauh niin a lang a, Thawhṭanni zan an inkhel aṭanga thlir chuan last 16 lut tur hi sawi thiam a harsa rih hle. 

'Kyrgyzstan lakah China an vannei' tih hi inkhelh hma zawng kha chuan ṭawngkam awm tak a ni kher lo mai thei - mahse inkhel a zawh meuh erawh chuan China-in an vannei tih an pawm ang. 

Kyrgyz Republic tan hian Akhlidin Israilov chuan rin loh takin goal hmahruai a khung a, China an hawihai hle. Mahse, World Cup meuh champion tawh Marcello Lippi enkawlna hnuaia khel China an beidawng lo. 

Kyrgyz keeper Pavel Matiash chuan minute 50-naah corner aṭanga ball kal chu awlsam taka man tur niin lang mah se an lamah a nam lut a, minute 70-naa Yu Dabao goal khung tur dang turin a tlan chhuak hma hret bawk - 2-1 in China an chak.

South Korea-in an thiampuipa Son Heung-min an la chhawr thei lo a, England coach hlui tawnhriat ngah Sven-Goran Eriksson enkawlna hnuaia khel Philippines chu 1-0 in an hneh hram. 

South Korea tana goal awmchhun hi Hwang Ui-Jo-a'n minute 67-naa a khung a ni a, Philippines-in a chhanletna tur zawng mah se Korea goalkeeper Kim Seung-gyu a chet ṭhat avangin a a tlawm zawkah an ṭang. 

Tottenham Hotspur forward Son Heung-min-a'n match tawp ber hma chu South Korea tan a khel thei dawn rih lo - hei hi Asian Games a khelh dawna Spurs nen inremna an neih vang a ni. Nikum khan Asian Games hi khelh a ni a, Son kaihhruaina hnuaiah South Korea an champion. English club hian an player hi a rim lutuk tur ven nan Asian Cup group match hmasa pahnih awltir turin South Korea nen an inrem a ni.