Mizo nihna kan zahpui loh a ṭul - C Lalsawivunga

Minister C Lalsawi-vunga chuan, Mizo hnam lâm leh zai, hnam zia leh Mizo nihna te chu zahpui lo a, uar zawka pho chhuah a ṭul thu a sawi.

C Lalsawivunga hian nimina Republic Veng Branch YMA-in YMA Day an lawmna a hmanpuinaah thu sawiin, "Khawvel huapa Mizo kan inpho chhuah theihna awm chhun chu kan culture a ni a, kan hnam lâm te, kan hnam zai te, kan hnam zia leh Mizo nihphungte hi uar zawka kan phochhuah a, kan zahpui loh a ngai," a ti.

Mizote'n zirna an uar lehzual a pawimawh hu sawiin Lalsawivunga chuan, "Zirna hi hnam dinchhuahna a nih avangin YMA thiltumah pawh kan neih ram leh hnam hmasawnna tur ngaihtuah tih hi a tak taka ngaihtuah a ngai," a ti a; zirna tihhmasawnna tura hmalaknaah sorkar thâ tichaktu ni turin YMA-te a ngen.

Aizawl South-I bialtu MLA chuan, zu leh ruihhlo do zel a ṭul thu te, Kristian nun dan ṭha chawisang zel chunga YMA tlat reng chu ram leh hnam humhalh nan leh hmasawn nan a pawimawh reng dawn thu a sawi bawk.

Inkhawmah hian Republic Veng chhunga kumin HSLC leh HSSLC-a ti ṭhate chawimawina hun hman a ni a, bialtu AMC corporator Lalremruati Sailo-in a hlan a ni.