Arsenal mikhual tur Man United

FA Cup champion hnem ber Arsenal chuan an mahni hnaih bertu Manchester United chu fourth round-ah an mikhual dawn, Gunners hian an hmelmain an record an rawn nih rual mai tur dan an duh a nih chuan an chak a ngai ang.

Football knockout tournament hmasa ber FA Cup fourth round khelh hun hi a la chiang lo a, ruahman lawk dan chuan January thla tawpah khelh a ni ang. United manager hlui Sir Alex Ferguson chuan Arsenal hi tuna English football ngaihven a hlawh theihna chhan pakhat an nih thu a sawi tawh a, Arsene Wenger hote nena an nomawi inchuh boruak san vang a ni.

Tun thleng pawhin Roy Keane leh Patrick Viera te hunlaia United leh Gunners inkhel chu dah san a ni a. Tunah erawh khang hunlai kha pha lo mah se Unai Emery hnuaia Arsenal in dinthar leh, Ole Gunnar Solskjaer hnuaia harh thar United inkhel tur hian en a hlawh khawp ang.

Arsenal hian FA Cup title vawi 13 an la tawh a, vawi 12 champion tawh Man United nen an inthlau lo hle. FA Cup bika club pahnihte intawn hnuhnung ber chu March 2015 kha niin, striker Danny Welbeck-a'n a club hlui lakah goal khungin Old Trafford-ah Gunners an chak.

Third round-ah khan United hian Juan Mata leh Romelu Lukaku te goal hmangin Championship club Reading 2-0 in an hneh a, a zawna a vawi nga nan fourth round an lut. Arsenal pawhin rawlthar rual hmangin an mikhualna ramah Blackpool chu 3-0 in an hneh a ni.

Fourth round thleng phak zinga dinhmun hniam ber chu Barnet an ni. Non-league club hian an khelmualah Championship club Brentford an hmachhawn dawn a, round sang zawk an thleng leh a nih pawhin a mak lo ang. Premier League club Cardiff hnehtu League One club Gillingham chuan Welsh club bawk hmachhawn turin Swansea City an tlawh dawn.

Premier League champion Manchester City chuan league lama an elpui an hmachhawn dawn. Mahse, Pep Guardiola naute hmachhawn tur Burnley hi a mawng lama talbuai lai an nih avangin harsa lutuk loin an tlang tura ngaih a ni. EPL club dang Crystal Palace leh Tottenham te an inkhel dawn bawk.

Champion lai Chelsea hmaah Sheffield Wednesday emaw Luton Town an awm dawn, Blues hian an khelmual hman thiam Stamford Bridge-ah an khelh theih dawn avangin hna a hautak lo ang. Liverpool hnehtu Wolves chu Shrewsbury emaw Stoke khelmualah an lenglung thung dawn a ni.