Real tan insiamṭhat hun a thleng dawn?

La Liga-a an match hnu­hnung berah hnehna an chan zawh loh hnuin Real Madrid chu zanin dar 2:00-ah Copa del Rey last 16 first leg khel turin an inlan dawn a, Leganes an mikhual ang.

Real Sociedad laka 2-0 a chak lo hlim Real hi zaninah an insiamṭha thei ang em, tih chu fans tam zawk thinlunga awm a ni - zaninah hnehna an chang zo lo a nih ngat chuan thil inthlak danglam kan hmu a nih pawhin a mak lo ang. 

Real hian an coach nilai Santiago Solari hi kum 2021 season tawp thleng atan contract an neihpui a, mahse tun hnaiah club president Florentino Perez-a atchilh Jose Mourinho chu club nei loin a awm mek a, Perez hian Solari-a'n a duh ang result a pek loh chuan chawlhtir a hreh lo ang. 

Madrid hian Sociedad laka hnehna an chan zawh loh hnuah Thawhṭanni zing khan training an ṭan leh nghal a, coach Solari leh captain Sergio Ramos te chuan player te fuihna hun an hmang. 

Spanish chanchinbu lar Mar­ca-in a tarlan danin Real coach leh captain te hian aw ka vin hmang loin player-te hi an fuih a, minute nga chhung vel ve ve thu sawiin player-te chu Real tana theihtawp chhuah turin an fuih. 

Real hian Sociedad an hneh loh hma hian Villarreal chu 2-2 in an inhnehtawkpui tawh bawk a, league-ah point 54 hlawhchhuah theih aṭangin point 30 chiah an la hlawh chhuak a, an dinhmun a chhe tak zet - Leganes lakah an insiamṭha lo a nih ngat chuan league pawh an tan a harsat chhunzawm zel ang. 

Real Madrid-in insiamṭhat an mamawh karah chanchin lawmawm lo an neih belh a, Sociedad lakah khan midfielder Toni Kroos chu hliam vanga lakchhuah niin kar hnih chhung a inlan thei dawn lo. 

Kroos hian Leganes hi a hmachhawn ve thei dawn lo tihna a ni a, league lamah Real Betis leh Sevilla a hmachhawn thei lo bawk ang. 

Tun dinhmunah hian Real player zingah Mariano Diaz, Marco Asensio, Gareth Bale leh Marcos Llorente te chu hliam vangin an chhawr theih loh vek a, Real dinhmun hi a duhawm lo hle. 

Hliam vangin Bale-a'n Socie­­­dad a hmachhawn ve thei lo a, inkhel entu zingah erawh a tel. Welsh forward hian 1-0 a an chak loh laiin khelmual a chhuahsan a, hei hian khawthlang media-ah chuan titi a siam leh der tawh. 

A ṭhianten khelmuala theih­tawp an chhuah laia hma taka Bale-a haw hian sawisel a hlawh a, team boruak ṭha lo hrilhfiahtu a ni em, tih thlengin an sawi - engmah erawh a chiang lo. 

Kum 29 mi forward hi Cristiano Ronaldo chhuah khan Portuguese forward hmun ruak luah khat tur anga ngaih a ni a, tun dinhmunah erawh beisei a phak lo hle - hliam vangin a buai fo a, league-ah goal li chiah a la khung a, inelna hrang hrangah goal 10 a khung.