Arrivabene thlaktu Binotto
Formual 1 team hlun Ferrari chuan season tharah danglamna thlentir ngei an tum a, team an insiksawi nghal. Team principal Maurizio Arrivabene chu technical boss hlui Mattia Binotto-a'n a dinhmun a luah sak.
Arrivabene hian Ferrari team principal hna hi tun hnai kum li chhungin a thawk. An thlak chhan hi Ferrari chuan, "Hun rei tak ngaihtuah a nih hnuah ruahmanna ṭha zawk a awm theih beisei vang," tiin an sawi.
Ferrari hi tun hma chuan team ṭha leh elphak loh ang hiala ngaih an ni ṭhin. Team ṭha pangngai chu ni reng mah se tun hnaiah Mercedes an tluk lo hle, driver
ṭha taka ngaih Sebastian Vettel nei tawh mah se German tlangval hian Red Bull car a khelh hunlaia a hun tawn ang pawh a la tawng phak lo.
Car intlansiakna sang ber Formula 1 season thar hi March thla aṭangin tlan ṭan a ni leh dawn a, intlansiak vawi 21 neih tur niin a hnuhnung ber atan November thla tawpah Abu Dhabi Grand Prix tlan a ni ang.