Wimbledon-ah Williams te unau

Grand Slam inelna ngaihhlut Wimbledon khel turin Serena Williams leh Venus Williams ten wild card an hmu a, an unau hian doubles-ah an ang dun dawn. Chutihrualin Serena emaw Venus emaw hi singles-ah wild card pek an ni lo thung.

Kum 44 mi Serena hi kar liam ta khan Queen's inelnaah a rawn kir a, 2022 US Open a khelh zawha a khelh leh hmasak ber a ni. Doubles-ah Victoria Mboko nen an angdun a, che ha viau mah se singles inelnaah Mboko hi a inhliam avangin loh theih loin an inhnuhdawh a ul phah.

Grand Slam singles vawi 23 champion tawh Serena hian Wimbledon-ah ringawt pawh vawi sarih a champion tawh. Tunah hian Berlin-ah Karolina Muchova nen an ang dunin inelna an hmachhawn a, nizan khan last 16 khelin result kan hre hman lo.

Wimbledon-ah erawh Serena hian a u Venus a kawppui dawn. Kum 45 mi Venus hian tun season-ah match sarih khel tawhin a chak lo vek a, doubles bikah erawh kumin April thla khan Katie Boulter nen an dunin chak hmel erawh a hmu ve thung.