European Champion Spain an nil
Kumin World Cup champion rinkai zinga mi Spain chu an match hmasa berah Cape Verde nen Thawhṭanni zan khan goal awm loin an inhnehtawk a, European champion hian a vawi khat nana World Cup khel team lakah goal an khung thei lo.
An inthlau
Spain coach Luis de la Fuente-a'n si ban nghak turin Unai Simon a hmang a, tlarhnungah Marcos Llorente, Pau Cubarsi, Aymeric Laporte leh Marc Cucurella te an ding tlar. Midfield-ah Rodi, Pedri leh Fabian Ruiz te an awm bawk a, tlarhmaah Ferran Torres, Gavi leh Mikel Oyarzabal ten bul an ṭan bawk.
Inkhel ṭan aṭangin rin lawk angin Spain-in ball an chang hnem zawk a, Pedri leh Cucurella ten chance nei nghal mah se keeper tan hna hautak an siam thei lo. Pedri hian tuma tihbuai lohin chance nei chhunzawm mah se Cape Verde keeper Vozinha-a'n ṭha zetin a dang.
La Roja-in an nawr chhunzawm zel a, Rodri ball vawr luh aṭanga kal zel chu Torres-a'n hnai tak aṭangin bar a pet per a, Oyarzabal chuan tauh zui mah se Vozinha bawkin a nam over hman. First half injury time-ah Vozinha hian Torres leh Laporte te shot a dansak leh a, goal lut loin chawlhlawk an hmang.
Second half-ah Spain bawkin inkhel an thunun a, mahse chance hlauhawm an insiam hleithei lo. Ruiz leh Mikel Merino te chuan an hun ṭha neih an chhawr ṭangkai thei lo a, Vozinha-a'n awlsam takin a mansak.
Goal mamawh Spain-in Lamine Yamal an luhtir a, damkawr Yamal-a'n a thiamzia rawn tilang nghalin, an goal bawh tina mah se, danglamna thlen turin goal a keng tel bik lo. Bench aṭanga lut Nico Williams pawhin tih theih a nei lo a, hun tawp thlenga goal a luh tawh loh avangin Spain-in an result-a lungawi bak tih theih an nei lo.
Coach a confi
Chak zo lo mah se Spain coach De la Fuente a hlauthawng lo a, kum 64 mi coach chuan,"Match khatna a nih avangin kan la insiamrem thei lo a, a hmawr kan bawk fuh thei lo bawk. Mahse match sarih khelh tur kan la nei a, zinkawng thui tak a la nih dawn avangin kan kan hlauthawng lo," a ti.
Spain hi March 2023 aṭang khan hneh loh an tawng tawh lo a, a zawnin match 23 chhung an kaltluang tawh. Mahse European champion tan Cape Verde laka an result hi lawmna tur a ni lo.
2010-a an champion hnuah round of 16 an la paltlang thei lo a, beiseina sang tak nen kuminah khel mah se bul an ṭan fuh tawk lo a, Saudi Arabia leh Uruguay an hmachhawn hunah result ṭha zawk an beisei ang.