Mipui mit fukna Vozinha

Inkhelh tawp ruala langsar ber chu Cape Verde goalkeeper Vozinha a ni a, kum 40 mi Vozinha hian vawi sarih ngawt save neiin 'man of the match'-ah thlan a ni a, World Cup a 'clean sheet' nei thei upa record a siam bawk.

Vozinha hi amateur football khela club hrang hranga a khelh kual hnuah, 2012 khan Angola club Progresso do Sambizanga-in professional ni turin an la lut a, hetah hian kum 25 a ni tawh. Vozinha hi tunah Portuguese second division club Chaves-ah a khel mek.

Professional a nih hma hian electrician a nih bakah bus a khalh ṭhin bawk a, mahse tunah erawh world ranking-a pathumna Spain laka an ram chhanhimtu a ni.

Cape Verde keeper chuan "Kan chakna ber chu kan inpumkhatna hi a ni. Vawiina lo thleng thar player pawh nise, kum 10 emaw 15 emaw lek a upa pawh nise, chhungkua anga kan inenna hi kan chakna thapui ber leh kan hmachhuan ber a ni.

Mi zawng zawngin World Cup tikimtu satliah turah min ngai a ni mai thei, chu chu thil dik a ni lo. Keini aia ram lian leh ṭha an awm pawh a ni thei, mahse he lai hmunah hian inel tur leh kan ram tana theihtawp chhuah tura lo kal kan ni," a ti.