Egypt lakah Belgium him hram

Europe ram lian zinga chhiar tel Belgium chuan Thawhṭanni zan khan, Egypt laka goal an chhuah hmasak hnuah an siphurh sutin an him hram. Group G inkhelah Egypt tan Emam Ashour-a'n first half-ah a khung a, Belgium-in second half-ah Egypt defender Mohamed Hany-a'n an lama a tihluh hmangin an sut a, 1-1 in inkhel a tawp.

Salah pass

Seattle Stadium-a inkhelah Belgium-in goal an khung nghal ṭep a, an thiampuipa Kevin De Bruyne chuan goal zawnah a pet lo hlauh. Egypt erawhin an chance neih hmasak berah goal an khung nghal a, Mohamed Salah pass chu Emam Ashour-a'n kawh zeta pet nghalin goal kilah pet lut a, Egypt hma a hruaipui. Belgium keeper Thibaut Courtois tan dan ngaihna a awm lo.

Egypt-in chance an neih chhunzawm a, Mostafa Ziko chuan ding lam sir aṭangin goal-ah a pet a, Real Madrid keeper Courtois-a'n a dang per hman hlauh. Pharaohs tan Omar Marmoush pawhin Belgian defender Nathan Ngoy tihsual aṭangin goal khungna remchang a nei a, Manchester City forward hian Courtois a paltlang thei lo.

Own Goal

Second khelh aṭanga rei loteah De Bruyne chuan freekick aṭangin ban a pet per a, hemi hnu lawk hian Salah-a'n chance neih mah se Courtois an paltlang thei tawh lo a, Marmoush pawhin keeper chiah a hmachhawn hnuah goal zawnah a pet thei lo.

Belgium-in minute 66-naah Romelu Lukaku an luhtir a, Lukaku luh aṭanga minute khat pawh a ral hmain goal an khung. Thomas Meunier-a cross chu Egypt defender Mohamed Hany chuan, Lukaku a venna lamah an lamah a pet lut palh a, Belgium siphurh a sutsak.

Goal an khung hnuah Belgium an phur a, mahse chance hlauhawm an insiam hleithei lo. Brandon Mechele leh Lukaku ten an hun ṭha neih an chhawr ṭangkai thei lo a, hun tawp thlenga goal dang a luh tawh loh avangin team pahnihten point an insem.

Point khat vek

Team pahnihte hi chak zo lo mah se group G-a an awmpui, Iran leh New Zealand te lakah rinkai an ni ve ve tho a, group stage paltlang turin harsatna an tawh a rinawm loh. Chutihrualin an match hnihnaah an chesual a nih chuan, round of 32 lut turin match tawp berah theihtawp an chhuah a ngai dawn a, group danga pathumna dang aia an tihṭhat a ngai bawk ang.

Group G team paliin point khat vek an hmu a, Belgium hian June 21, Pathianni zanah Iran an hmachhawn ang a; Egypt hian June 22, Thawhṭanni zing dar 6:30-ah New Zealand an hmachhawn thung ang.