Uruguay chhanhimtu Araujo

World Cup champion hmasa ber Uruguay chuan Thawhṭanni zan khan, Saudi Arabia lakah an chak dawn loa a lan tawh hnuin Maximiliano Araujo-a'n goal pawimawh a khung a, an mualpho tur chhamhimin 1-1 in an inhnehtawk. Uruguay tana goal khungtu Araujo hi Indian thisen kai a ni.

Inkhel ṭan aṭangin Uruguay an chungnung zawk a, Araujo leh Manchester United midfielder Manuel Ugarte ten chance nei mah se Saudi keeper Mohammed Al-Owais en chhinna chauh a ni.

Minute 41-naah rin loh zawk Saudi-in goal an khung hmasa a, corner aṭanga Mohamed Kanno tauh chu Uruguay keeper, Fernando Muslera-a'n hmun himah a dang per zo lo a, Abdulelah Al-Amri chuan hnai tak aṭangin a pet goal a, Saudi hma a hruaipui.

Goal hmaa an hriam tawk loh avangin Uruguay-in minute 80-naah an siphurh an sut chauh a, Federico Viñas-a tauh chu Saudi keeper Al-Owais chuan dang perin, Araujo-a'n chiang takin a pet goal a, an siphurh sutna goal a khung. Goal dang lut loin inkhel a tawp a, chak zawk awm loin inkhel a tawp.

Uruguay tana goal khungtu Araujo pu hi Loutolim, Goa chhuak niin Angola leh Brazil-a a insawn hnuah Uruguay-ah a inbengbel. Araujo bakah hian New Zealand midfielder Sarpreet Singh, Qatar defender Tahsin Mohammed Jamshid, Australia forward Nishan Velupillay leh DR Congo midfielder Samuel Moutoussamy te chu Indian thisen kai zinga World Cup khel an ni.

Marcelo Bielsa hote hi champion tura rinkai ni chiah lo mah se, Saudi Arabia laka chak zawh loh hi lawmna tur a ni lo. Mahse an lawmna turin group H-a an awmpui Spain leh Cape Verde te an inhnehtawk a, chungnung bik an la awm loh avangin round of 32 luh inchuh boruak a la sang dawn chauh.